ЕВАНГЕЛИЕ ЕЖЕ Ѿ МАТѲЕꙖ
6:1
Ⰲⱐⱀⰵⰿⰾⱑⱅⰵ ⰿⰻⰾⱁⱄⱅⱏⰹⱀⱔ ⰲⰰⱎⰵⱗ ⱀⰵ ⱅⰲⱁⱃⰻⱅⰻ ⱂⱃⱑⰴⱏ ⱍⰾⰲ҃ⰽⱏⰹ ⰴⰰ ⰲⰻⰴⰻⰿⰻ ⰱⱘⰴⰵⱅⰵ ⰻⰿⰻ. ⰰⱎⱅⰵ ⰾⰻ ⰶⰵ ⱀⰻ ⰿⱏⰸⰴⱏⰹ ⱀⰵ ⰻⰿⰰⱅⰵ. ⱁⱅⱏ ⱁⱅ҃ⱌⰰ ⰲⰰⱎⰵⰳⱁ ⰻⰶⰵ ⰵⱄⱅⱏ ⱀⰰ ⱀⰱ҃ⱄⱈⱏ.
6:2
ⰵⰳⰴⰰ ⱆⰱⱁ ⱅⰲⱁⱃⰻⱎⰻ ⰿⰻⰾⱁⱄⱅⱏⰹⱀⱙ. ⱀⰵ ⰲⱏⱄⱅⱃⱘⰱⰻ ⱂⱃⱑⰴⱏ ⱄⱁⰱⱁⱙ. ⱑⰽⱁ ⱛⱂⱁⰽⱃⰻⱅⰻ ⱅⰲⱁⱃⱔⱅⱏ. ⰲⱏ ⱄⱏⱀⱐⰿⰻⱎⱅⰻⱈⱏ ⰻ ⰲⱏ ⱄⱅⱏⰳⱀⰰⱈⱏ. ⰴⰰ ⱂⱃⱁⱄⰾⰰⰲⱔⱅⱏ ⱄⱔ ⱁⱅⱏ ⱍⰾⰲ҃ⰽⱏ. ⰰⰿⰻⱀⱏ ⰳⰾ҃ⱙ ⰲⰰⰿⱏ. ⰲⱐⱄⱂⱃⰻⰻⰿⱘⱅⱏ ⰿⱏⰸⰴⱘ ⱄⰲⱁⱙ ::
6:3
Ⱅⰵⰱⱑ ⰶⰵ ⱅⰲⱁⱃⱔⱋⱓ ⰿⰻⰾⱁⱄⱅⱏⰹⱀⱙ. ⰴⰰ ⱀⰵ ⱍⱓⰵⱅⱏ ⱎⱓⰻⱌⰰ ⱅⰲⱁⱑ. ⱍⱐⱅⱁ ⱅⰲⱁⱃⰻⱅⱏ ⰴⰵⱄⸯⱀⰻⱌⰰ ⱅⰲⱁⱑ.
6:4
ⰴⰰ ⰱⱘⰴⰵⱅⱏ ⰿⰻⰾⱁⱄⱅⱏⰹⱀⰻ ⱅⰲⱁⱑ ⰲⱏ ⱅⰰⰻⱀⱑ. ⰻ ⱁⱅ҃ⱌⱏ ⱅⰲⱁⰻ ⰲⰻⰴⱔⰻ ⰲⱏ ⱅⰰⰻⱀⱑ ⰲⱏⰸⰴⰰⱄⱅⱏ ⱅⰵⰱⱑ ⰰⰲⱑ.
6:5
ⰺ҅ ⰵⰳⰴⰰ ⰿⱁⰾⰻⱎⰻ ⱄⱔ ⱀⰵ ⰱⱘⰴⰻ ⱑⰽⱁ ⰻ ⰾⰻⱌⰵⰿⱑⱃⰻ. ⱑⰽⱁ ⰾⱓⰱⱔⱅⱏ ⱀⰰ ⱄⱁⱀⱏⰿⰻⱎⱅⰻⱈⱏ ⰻ ⰲⱏ ⱄⱅⱏⰳⱀⰰⱈⱏ ⰻ ⱀⰰ ⱃⰰⱄⱂⱘⱅⰻⱈⱏ ⱄⱅⱁⱗⱎⱅⰵ ⰿⱁⰾⰻⱅⰻ ⱄⱔ. ⰴⰰ ⱑⰲⱔⱅⱏ ⱄⱔ ⱍⰾⱁⰲⱑⰽⱁⰿⱏ. ⰰⰿⰻⱀⱐ ⰳⰾ҃ⱙ ⰲⰰⰿⱏ. ⱑⰽⱁ ⰲⱏⱄⱂⱃⰻⰵⰿⰾⱙⱅⱏ ⰿⱏⰸⰴⱘ ⱄⰲⱁⱙ.
6:6
ⱅⱏⰹ ⰶⰵ ⰵⰳⰴⰰ ⰿⱁⰾⰻⱎⰻ ⱄⱔ ⰲⱏⱀⰻⰴⰻ ⰲⱏ ⰽⰾⱑⱅⱐ ⱅⰲⱁⱙ ⰻ ⰸⰰⱅⰲⱁⱃⰻ ⰴⰲⱐⱃⰻ ⱅⰲⱁⱗ. ⱂⱁⰿⱁⰾⰻ ⱄⱔ ⱁⱅ҃ⱌⱆ ⱅⰲⱁⰵⰿⱆ ⰲⱏ ⱅⰰⰻⱀⱑ. ⰺ҅ ⱁⱅ҃ⱌⱏ ⱅⰲⱁⰻ ⰲⰻⰴⱔⰻ ⰲⱏ ⱅⰰⰻⱀⱑ. ⰲⱏⰸⰴⰰⱄⱅⱏ ⱅⰵⰱⱑ ⰰⰲⱑ
6:7
Ⰿⱁⰾⱔⱋⰵ ⰶⰵ ⱄⱔ ⱀⰵ ⰾⰻⱈⱁ ⰳⰾ҃ⱅⰵ. ⱑⰽⱁⰶⰵ ⰻ ⱗⰸⱏⰹⱍⱏⱀⰻⱌⰻ. ⰿⱐⱀⱔⱅⱏ ⰱⱁ ⱄⱔ ⱑⰽⱁ ⰲⱁ ⰿⱏⱀⱁⰷⱑ ⰳⰾ҃ⱀⰻ ⱄⰲⱁⰵⰿⱐ ⱆⱄⰾⱏⰹⱎⰰⱀⰻ ⰱⱘⰴⱘⱅⱏ.
6:8
ⱀⰵ ⱂⱁⰴⱁⰱⰻⱅⰵ ⱄⱔ ⱆⰱⱁ ⰻⰿⱏ. ⰲⱑⱄⱅⱏ ⰱⱁ ⱁⱅⰵⱌⱏ ⰲⰰⱎⱏ ⰻⱈⱏⰶⰵ ⱅⱃⱑⰱⱆⰵⱅⰵ. ⱂⱃⱑⰶⰴⰵ ⱂⱃⱁⱎⰵⱀⰻⱑ ⰲⰰⱎⰵⰳⱁ.
6:9
ⱅⰰⰽⱁ ⱆⰱⱁ ⰿⱁⰾⰻⱅⰵ ⰲⱏⰹ ⱄⱔ. ⱉ҅ⱅⱐⱍⰵ ⱀⰰⱎⱏ ⰻⰶⰵ ⱄⰻ ⱀⰰ ⱀⰱ҃ⱄⱈⱏ ⰴⰰ ⱄⰲ҃ⱅ ⱄⱔ ⰻⰿⱔ ⱅⰲⱁⰵ.
6:10
ⰴⰰ ⱂⱃⰻⰴⰵⱅⱏ ⱌⱄ҃ⱃⰵⱄⱅⰲⰻⰵ ⱅⰲⱁⰵ. ⰴⰰ ⰱⱁⰴⰵⱅⱏ ⰲⱁⰾⱑ ⱅⰲⱁⱑ. ⱑⰽⱁ ⱀⰰ ⱀⰱ҃ⱄⰻ ⰻ ⱀⰰ ⰸⰵⰿⰻ.
6:11
ⱈⰾⱑⰱⱏ ⱀⰰⱎⱏ ⱀⰰⱄⱅⰰⰲⱏⱎⰰⰰⰳⱁ ⰴⱐⱀⰵ. ⰴⰰⰶⰴⱏ ⱀⰰⰿⱏ ⰴⱏⱀⰵⱄⱐ
6:12
ⰺ ⱁⱅⱏⱂⱁ[у]ⱄⱅⰻ ⱀⰰⰿⱏ ⰴⰾⱏⰳⱏⰹ ⱀⰰⱎⱔ. ⱑⰽⱁ ⰻ ⰿⱏⰹ ⱁⱅⱏⱂⱆⱎⱅⰰⰵⰿⱏ ⰴⰾⱏⰶⱏⱀⰻⰽⱁⰿⱏ ⱀⰰⱎⰻⰿⱏ.
6:13
ⰺ ⱀⰵ ⰲⱐⰲⰵⰴⰻ ⱀⰰⱄⱏ ⰲⱏ ⱀⰰⱂⰰⱄⱅⱐ. ⱀⱐ ⰻⰸⰱⰰⰲⰻ ⱀⱏⰹ ⱁⱅⱏ ⱀⰵⱂⱃⰻⱑⰸⱀⰻ. ⱑⰽⱁ ⱅⰲⱁⰵ ⰵⱄⱅⱏ ⱌⱄ҃ⱃⱄⱅⰲⰻⰵ. ⰺ ⱄⰻⰾⰰ ⰻ ⱄⰾⰰⰲⰰ ⰲⱐ ⰲⱑⰽⱏⰹ ⰰⰿⰻⱀⱐ.
6:14
Ⰰⱋⰵ ⱆⰱⱁ ⱁⱅⱏⱂⱆⱋⰰⰵⱅⰵ ⱍⰾⰲ҃ⰽⰿⱏ ⱄⱏⰳⱃⱑⱎⰵⱀⰻⱑ ⰻⱈⱏ ⱁⱅⱏⱂⱆⱄⱅⰻⱅⱏ ⰻ ⰲⰰⰿⱏ ⱁⱅ҃ⱌⱏ ⰲⰰⱎⱏ ⱀⰵⰱ҃ⰵⱄⰽⱏⰹ.
6:15
ⰰⱎⱅⰵ ⰾⰻ ⱀⰵ ⱁⱅⱏⱂⱆⱋⰰⰵⱅⰵ ⱍⰾⰲ҃ⰽⱁⰿⱏ ⱄⱏⰳⱃⱑⱎⰵⱀⰻ ⰻⱈⱏ. ⱀⰻ ⱁⱅ҃ⱌⱏ ⰲⰰⱎⱏ ⱁⱅⱏⱂⱆⱄⱅⰻⱅⱏ ⱄⱏⰳⱃⱑⱎⰵⱀⰻⰻ ⰲⰰⱎⰻⱈⱏ.
6:16
ⰵⰳⰴⰰ ⰶⰵ ⱂⱁⱄⱅⰻⱅⰵ ⱄⱔ. ⱀⰵ ⰱⱘⰴⱑⱅⰵ ⱑⰽⱁ ⰻ ⱛ҅ⱂⱁⰽⱃⰻⱅⰻ. ⱂⱃⱁⱄⰿⱃⰰⰶⰴⰰⱙⱅⱏ ⰱⱁ ⰾⰻⱌⰰ ⱄⰲⱁⱑ. ⰴⰰ ⰱ[ⱘ] ⱄⱔ ⰰⰲⰻⰾⰻ ⱍⰾⰲ҃ⰽⱁ[ⰿⱏ] ⱂⱁⱄⱅⱔⱋⰵ. ⰰⰿⰻⱀⱏ ⰳⰾ҃ⱙ ⰲⰰⰿⱏ. ⱑⰽⱁ [ⰲⱏ]ⱄⱂⱃⰻⰵⰿⰾⱙⱅⱏ ⰿ[ⱏ]ⰸⰴⱘ ⱄⰲⱁⱙ.
6:17
ⱅⱏⰹ ⰶⰵ ⱂⱁⱄⱅⱔ ⱄⱔ ⱂⱁⰿⰰⰶⰻ ⰳⰾⰰⰲⱘ ⱄⰲⱁⱙ. ⰺ ⰾⰻⱌⰵ ⱅⰲⱁⰵ ⱆⰿⱏⰹⰻ.
6:18
ⰴⰰ ⱀⰵ ⰰⰲⰻⱎⰻ ⱄⱔ ⱍⰾⰲ҃ⰽⰿⱏ ⱂⱁⱄⱅⱔ ⱄⱔ. ⱀⱏ ⱁⱅⱏⱌⱆ ⱅⰲⱁⰵⰿⱆ ⰻⰶⰵ ⰵⱄⱅⱏ ⰲⱏ ⱅⰰⰻⱀⱑ. ⰺ ⱁⱅ҃ⱌⱏ ⱅⰲⱁⰻ ⰲⰻⰴⱔⰻ ⰲⱏ ⱅⰰⰻⱀⱑ. ⰲⱏⰸⰴⰰⱄⱅⱏ ⱅⰵⰱⱑ ⱑⰲⱑ.
6:19
Ⱀⰵ ⱄⱏⰽⱃⱏⰹⰲⰰⰻⱅⰵ ⱄⰵⰱⱑ ⱄⱏⰽⱃⱁⰲⰻⱎⱅⰰ ⱀⰰ ⰸⰵⰿⰻ. ⰺ҅ⰴⰵⰶⰵ ⱍⱃⱏⰲⱏ ⰻ ⱅⱐⰾⱑ ⱅⱐⰾⰻⱅⱏ . ⰺ҅ⰴⰵⰶⰵ ⱅⰰⱅⰻⰵ ⱂⱁⰴⱏⰽⱁⱂⰰⰲⰰⱙⱅⱏ ⰻ ⰽⱃⰰⰴⱘⱅⱏ.
6:20
ⱄⱏⰽⱃⱏⰹⰲⰰⰻⱅⰵ ⰶⰵ ⱄⰵⰱⱑ ⱄⱏⰽⱃⱁⰲⰻⱎⱅⰰ ⱀⰱ҃ⱄⰵ. ⰺⰴⰵⰶⰵ ⱀⰻ ⱍⱃⱏⰲⱐ ⱀⰻ ⱅⱐⰾⱑ ⱅⱐⰾⰻⱅⱏ. ⰻⰴⰵⰶⰵ ⱅⰰⱅⰻⰵ ⱀⰵ ⱂⱁⰴⱏⰽⱁⱂⰰⰲⰰⱙⱅⱏ. ⱀⰻ ⰽⱃⰰⰴⱘⱅⱏ.
6:21
ⰺⰴⰵⰶⰵ ⰱⱁ ⰵⱄⱅⱏ ⱄⱏⰽⱃⱁⰲⰻⱋⰵ ⰲⰰⱎⰵ. ⱅⱆ ⰻ ⱄⱃⰴ҃ⱌⰵ ⰲⰰⱎⰵ. ⰽ!ⱌ
6:22
Ⱄⰲⱑⱅⰻⰾⱐⱀⰻⰽⱏ ⱅⱑⰾⱆ ⰵⱄⱅⱏ ⱁⰽⱁ. ⰰⱋⰵ ⱆⰱⱁ ⰱⱘⰴⰵⱅⱏ ⱁⰽⱁ ⱅⰲⱁⰵ ⱂⱃⱁⱄⱅⱁ. ⰲⱐⱄⰵ ⱅⱑⰾⱁ ⱅⰲⱁⰵ ⱄⰲⱑⱅⱏⰾⱁ ⰱⱘⰴⰵⱅⱏ.
6:23
ⰰⱎⱅⰵ ⰾⰻ ⱁⰽⱁ ⱅⰲⱁⰵ ⰾⱘⰽⰰⰲⱁ ⰱⱘⰴⰵⱅⱏ. ⰲⱐⱄⰵ ⱅⱑⰾⱁ ⱅⰲⱁⰵ ⱅⱐⰿⱏⱀⱁ ⰱⱘⰴⰵⱅⱏ. ⰰⱋⰵ ⱆⰱⱁ ⱄⰲⱑⱅⱏ ⰻⰶⰵ ⰲⱏ ⱅⰵⰱⱑ. ⱅⱏⰿⰰ ⰵⱄⱅⱏ ⱅⱑ ⱅⱏⰿⰰ ⰽⱁⰾⱐⰿⰻ.
6:24
ⱀⰻⰽⱏⰹ ⰶⰵ ⱃⰰⰱⱏ ⰿⱁⰶⰵⱅⱏ ⰴⱐⰲⱑⰿⰰ ⰳⱁⱄⱂⱁⰴⱐⰿⰰ ⱃⰰⰱⱁⱅⰰⱅⰻ. ⰾⰻ ⰱⱁ ⰵⰴⰻⱀⱁⰳⱁ ⰲⱏⱄⱀⰵⱀⰰⰲⰻⰴⰻⱅⱏ. ⰰ ⰴⱃⱆⰳⰰⰳⱁ ⰲⱐⰸⰾⱓⰱⰻⱅⱏ. ⰾⰻ ⰵⰴⰻⱀⱁⰳⱁ ⰴⱃⱏⰶⰻⱅⱏ ⱄⱔ ⰰ ⱁ ⰴⱃⱆⰷⱑⰵⰿⱐ ⱀⰵⱃⱁⰴⰻⱅⰻ ⱀⰰⱍⱐⱀⰵⱅⱏ. ⱀⰵ ⰿⱁⰶⰵⱅⰵ ⰱ҃ⱆ ⱃⰰⰱⱁⱅⰰⱅⰻ. ⰻ ⰿⰰⰿⱁⱀⱑ
6:25
ⱄⰵⰳⱁ ⱃⰰⰴⰻ ⰳⰾ҃ⱙ ⰲⰰⰿⱏ. ⱀⰵ ⱂⱐⱌⱑⱅⰵ ⱄⱔ ⰴⱎ҃ⰵⱙ ⰲⰰⱎⰵⱙ. ⱍⱅⱁ ⱑⱄⱅⰵ ⰾⰻ ⱍⱅⱁ ⱂⰻⰵⱅⰵ ⱀⰻ ⱅⱑⰾⱁⰿⱏ ⰲⰰⱎⰻⰿⱏ ⰲⱏ ⱍⱅⱁ ⱁⰱⰾⱑⱍⰵⱅⰵ ⱄⱔ. ⱀⰵ [ⰴⱎ҃ⰰ] ⰾⰻ ⰱⱁⰾⱐⱎⰻ ⰵⱄⱅⱏ ⱂⰻⱎⱅⱔ. ⰻ ⱅⱑⰾⱁ ⱁⰴⰵⰶⰴⱔ.
6:26
ⰲⱏⰸⱐⱃⰻⱅⰵ ⱀⰰ ⱂ!ⱅⰻⱌⱔ ⱀⰱ҃ⱄⰽⱏⰹⱗ. ⱑⰽⱁ ⱀⰵ ⱄⱑⱙⱅⱏ ⱀⰻ ⰶⱐⱀⱙⱅⱏ. ⱀⰻ ⱄⱏⰱⰻⱃⰰⱙⱅⱏ ⰲⱐ ⰶⰻⱅⱐⱀⰻⱌⱘ. ⰺ ⱁⱅ҃ⱌⱏ ⰲⰰⱎⱏ ⱀⰱ҃ⱄⰽⱏⰹ ⱂⰻⱅⱑⰵⱅⱏ ⱗ. ⱀⰵ ⰲⱏⰹ ⰾⰻ ⱂⰰⱍⰵ ⰻⱈⱏ ⰾⱆⱍⱏⱎⰻ ⰵⱄⱅⰵ.
6:27
ⰽⱅⱁ ⰶⰵ ⱁⱅⱏ ⰲⰰⱄⱏ ⱂⰵⰽⱏⰹ ⱄⱔ. ⰿⱁⰶⰵⱅⱏ ⱂⱃⰻⰾⱁⰶⰻⱅⰻ ⱅⱑⰾⰵⱄⰵ ⱄⰲⱁⰵⰿⱐ ⰾⰰⰽⱁⱅⱐ ⰵⰴⰻⱀⱏ.
6:28
ⰺ ⱁ ⱁⰴⰵⰶⰴⰻ ⱍⱅⱁ ⱄⱔ ⱂⰵⱍⰵⱅⰵ. ⱄⱏⰿⱁⱅⱃⰻⱅⰵ ⰽⱃⰻⱀⱏ ⱄⰵⰾⱏⱀⱏⰹⱈⱏ. ⰽⰰⰽⱁ ⱃⰰⱄⱅⱘⱅⱏ. ⱀⰵ ⱅⱃⱆⰶⰴⰰⱙⱅⱏ ⱄⱔ ⱀⰻ ⱂⱃⱔⰴⱘⱅⱏ.
6:29
ⰳⰾ҃ⱙ ⰶⰵ ⰲⰰⰿⱏ. ⱑⰽⱁ ⱀⰻ ⱄⱁⰾⱁⰿⱁⱀⱏ ⰲⱁ ⰲⱐⱄⰵⰻ ⱄⰾⰰⰲⱑ ⱄⰲⱁⰵⰻ ⱁⰱⰾⱑⱍⰵ ⱄⱔ. ⱑⰽⱁ ⰵⰴⰻⱀⱏ ⱁⱅⱏ ⱄⰻⱈⱏ.
6:30
ⰰⱋⰵ ⰶⰵ ⱄⱑⱀⱁ ⱄⰵⰾⱏⱀⱁⰵ ⰴⱐⱀⰵⱄⱏ ⱄⱘⱎⱅⰵⰵ. ⰰ ⱆⱅⱃⱑ ⰲⱏ ⱁⰳⱀⱐ ⰲⱐⰿⰵⱅⱁⰿⱁ. ⰱ҃ⱏ ⱅⰰⰽⱁ =ⱉ=ⰴⱑⰵⱅⱏ. ⰽⱁⰾⱐⰿⰻ ⱂⰰⱍⰵ ⰲⰰⱄⱏ ⰿⰰⰾⱁⰲⱑⱃⰻ.
6:31
ⱀⰵ ⱂⱐⱌⱑⱅⰵ ⱄⱔ ⱆⰱⱁ ⰳⰾ҃ⱙⱋⰵ. ⱍⱅⱁ ⱑⰿⱏ ⰾⰻ ⱍⱅⱁ ⱂⰻⰵⰿⱏ. ⰾⰻ ⱍⰻⰿⱏ ⱁⰴⰵⰶⰴⰵⰿⱏ ⱄⱔ.
6:32
ⰲⱐⱄⱑⱈⱏ ⰱⱁ ⱄⰻⱈⱏ !ⱗⰸⱌⰻ ⰻⱋⱘⱅⱏ. ⰲⱑⱄⱅⱏ ⰱⱁ ⱁⱅⰵⱌⱏ ⰲⰰⱎⱏ ⱀⰱ҃ⱄⰽⱏⰹ. ⱑⰽⱁ ⱅⱃⱑⰱⱆⰵⱅⰵ ⱄⰻⱈⱏ ⰲⱐⱄⱑⱈⱏ.
6:33
ⰺⱎⱅⱑⱅⰵ ⰶⰵ ⱂⰰⱍⰵ ⱌⱄ҃ⱃⱄⱅⰲⰻⱑ ⰱⰶ҃ⰻⱑ. ⰺ҅ ⱂⱃⰰⰲⱏⰴⱏⰹ ⰵⰳⱁ . ⰺ҅ ⱄⰻ ⰲⱐⱄⱑ ⱂⱃⰻⰾⱁⰶⱔⱅⱏ ⱄⱔ ⰲⰰⰿⱏ. :: ⰽ!ⱌ ::
6:34
ⱀⰵ ⱂⱐⱌⱑⱅⰵ ⱄⱔ ⱆⰱⱁ ⱀⰰ ⱆⱅⱃⱑⰻ. ⱆⱅⱃⱀⰻ ⰱⱁ ⰴⰵⱀⱐ ⱄⱁⰱⱁⱙ ⱂⰵⱍⰵⱅⱏ ⱄⱔ. ⰴⱁⰲⱐⰾⰵⱅⱏ ⰴⱐⱀ[ⰻ] ⰸⱏⰾⱁⰱⰰ ⱄⰲⱁⱑ.