ЕВАНГЕЛИЕ ЕЖЕ Ѿ МАТѲЕꙖ
5:24
остави тоу даръ твои прѣдъ олътаремъ. ꙇ шедъ прѣжде съмири сѧ. съ братромъ своимъ. и тогда пришедъ принеси даръ твои ::
5:25
Бѫди оувѣщаѩ сѧ съ сѫпьремь своимь скоро. доньдеже еси на пѫти съ нимь. да не прѣдастъ тебе сѫдии. ꙇ сѫдии тѧ прѣдастъ слоуѕѣ. ꙇ въ темьницѫ въвръжетъ тѧ.
5:26
аминь гл҃ѭ тебѣ не изидеши отъ тѫдѣ. доньдеже въздаси послѣдьнии кодрантъ ::
5:27
Слꙑшасте ѣко речено бꙑ!с древънимъ. не прѣлюбꙑ сътвориши.
5:28
азъ же гл҃ѭ вамъ. ѣко вьсѣкъ иже вьзьритъ на женѫ съ похотиѭ. юже любꙑ сътвори съ неѭ въ срд҃ци своемь.
5:29
аще же око твое десное съблажнаатъ тѧ. ꙇзьми е и връзи отъ тебе. оунѣе бо ти естъ да погꙑблетъ единъ оудъ твоихъ. а не вьсе тѣло твое въвръжено бѫдетъ въ ђеонѫ.
5:30
ꙇ аште десна твоѣ рѫка съблажнаатъ тѧ оусѣци ѭ. и връзи отъ себе. оунѣе бо ти естъ да погꙑблетъ единъ оудъ твоихъ. а не вьсе тѣло твое идетъ въ ђеонѫ ::
5:31
речено же бꙑстъ. ꙇже аште поуститъ женѫ своѭ. да дастъ еи кънигꙑ распоустънꙑѩ.
5:32
азъ же гл҃ѭ вамъ. ѣко вьсѣкъ поуштаѩи женѫ своѭ развѣ словесе любодѣинааго. творитъ ѭ прѣлюбꙑ дѣати. ꙇ иже подъпѣгѫ поемлетъ прѣлюбꙑ творитъ.
5:33
пакꙑ слꙑшасте. ѣко речено бꙑ!с древьниимъ. не въ лъжѫ клънеши сѧ. въздаси же !гви клѧтвꙑ твоѩ.
5:34
азъ же гл҃ѭ вамъ. не клѧти сѧ отънѫдъ. ни !нбмь ѣко прѣстолъ естъ бж҃ии.
5:35
ни землеѭ. ѣко подъножие естъ ногама его. ни иерс҃лмъмъ ѣко г!рдъ естъ великааго цс҃рѣ.
5:36
ни главоѭ своеѭ клъни сѧ. ѣко не можеши власа единого бѣла ли чръна сътворити.
5:37
бѫди же слово ваше еи еи. ꙇ҅ ни ни. лихое бо сеѭ отъ неприѣзни естъ.
5:38
Слꙑшасте ѣко речено бꙑ!с. око за око и зѫбъ за зѫбъ.
5:39
азъ же гл҃ѭ вамъ. не противити сѧ зълоу. Нъ аще кто тѧ оударитъ въ деснѫѭ ланитѫ. обрати емоу и дроугѫѭ.
5:40
ꙇ хотѧщоумоу сѫдъ приѩти съ тобоѭ и ризѫ твоѭ възѧти. отъпоусти емоу и срачицѫ твоѭ.
5:41
и аще къто поиметъ тѧ по силѣ. попьрище едино. ꙇди съ нимь дьвѣ ::
5:42
Просѧштоумоу оу тебе даи. ꙇ хотѧштаго отъ тебе заѩти не отъврати.
5:43
слꙑшасте ѣко речено естъ. възлюбиши искрьнѣго своего. ꙇ вьзненавидиши врага своего.
5:44
азъ же гл҃ѭ вамъ. любите врагꙑ вашѧ. !благслвите клънѫштѧѩ вꙑ. добро творите ненавидѧштиимъ васъ ꙇ молите за творѧщѧѩ вамъ напасти. и изгонѧщѧѩ вꙑ.
5:45
да бѫдете сн҃ве от҃ца вашего иже естъ на неб҃схъ. ѣко слъньце свое сьѣатъ на зълꙑ и благꙑ. ꙇ҅ дъждитъ на праведънꙑ и на неправедънꙑ.
5:46
аще бо любите любѧщѧѩ вꙑ. кѫѭ мъздѫ имате. не и мꙑтаре ли тожде творѧтъ.
5:47
ꙇ аще цѣлоуете дроугꙑ вашѧ. токъмо что лихо творите. не и мꙑтаре ли тако творѧтъ.
5:48
бѫдѣте оубо вꙑ съвръшени. ѣко и отецъ вашъ нб҃скꙑ съвръшенъ естъ ::