Ⰱⱑ ⰶⰵ ⱂⰰⱄⱈⰰ ⰻ ⱁⱂⱃⱑⱄⱀⱏⱌⰻ ⱂⱁ ⰴⱏⰲⱁⱓ ⰴⱏⱀⱆ. ⰺ ⰻⱄⰽⰰⰰⱈⱘ ⰰⱃⱈⰻⰵⱃⰵⰻ ⰻ ⰽⱏⱀⰻⰶⱏⱀⰻⱌⰻ ⰽⰰⰽⱁ ⰻ ⰾⰵⱄⱅⱐⱙ ⰵⰿⱏⱎⰵ ⱆⰱⰻⱙⱅⱏ.

ⰳⰾ҃ⰰⱈⱘ ⰶⰵ ⱀⱏ ⱀⰵ ⰲⱏ ⱂⱃⰰⰸⰴⱐⱀⰻⰽⱏ. ⰵⰴⰰ ⰽⰰⰽⱁ ⰱⱘⰴⰵⱅⱏ ⰿⰾⱏⰲⰰ ⰾⱓⰴⰵⰿⱐ.

ⰺ ⱄⱘⱎⱅⱓ ⰵⰿⱆ ⰲⱏ ⰲⰻⱅⰰⱀⰻⰻ. ⰲⱏ ⰴⱁⰿⱆ ⱄⰻⰿⱁⱀⰰ ⱂⱃⱁⰽⰰⰶⰵⱀⰰⰰⰳⱁ. ⰲⱐⰸⰾⰵⰶⱔⱎⱅⱓ ⰵⰿⱆ ⱂⱃⰻⰴⰵ ⰶⰵⱀⰰ. ⰺⰿⱘⱎⱅⰻ ⰰⰾⰰⰲⰰⱄⱅⱃⱏ ⱈⱃⰻⰸⰿⱏⰹ. ⱀⰰⱃⱏⰴⱏⱀⱏⰹ ⱂⰻⱄⱅⰻⰽⰻⱗ ⰴⱃⰰⰳⱏⰹ. ⰺ҅ ⱄⱏⰽⱃⱆⱎⱏⱎⰻ ⰰⰾⰰⰲⰰⱄⱅⱃⱏ ⰲⱏⰸⰾⰻⱑ ⰵⰿⱆ ⱀⰰ ⰳⰾⰰⰲⱘ.

ⰱⱑⰰⱈⱘ ⰶⰵ ⰵⰴⰻⱀⰻ ⱀⰵⰳⱁⰴⱘⱙⱎⱅⰵ ⰲⱐ ⱄⰵⰱⱑ ⰻ ⰳⰾ҃ⱙⱎⱅⰵ. ⰲⱐ ⱍⰵⰿⱏ ⰳⱏⰹⰱⱑⰾⱐ ⱄⰻ ⱈⱃⰻⰸⰿⱏⱀⰰⱑ ⰱⱏⰹⱄⱅⱏ.

ⰿⱁⰶⰰⰰⱎⰵ ⰱⱁ ⱄⰻ ⱈⱃⰻⰸⰿⰰ ⱂⱃⱁⰴⰰⱀⰰ ⰱⱏⰹⱅⰻ. ⰲⱔⱎⱅⰵ ⱅⱃⰻ ⱄⱁⱅⱏ ⱂⱑⱀⱔⰷⱏ. ⰺ҅ ⰴⰰⱅⰻ ⱄⱔ ⱀⰻⱎⱅⰻⰻⰿⱏ ⰻ ⱂⱃⱑⱎⱅⰰⰰⱈⱘ ⰵⰻ.

ⰺⱄ҃ ⰶⰵ ⱃⰵⱍⰵ ⱁⱄⱅⰰⱀⱑⱅⰵ ⰵⱗ ⱂⱁ ⱍⱏⱅⱁ ⱙ ⱅⱃⱆⰶⰴⰰⰰⱅⰵ. ⰴⱁⰱⱃⱁ ⰱⱁ ⰴⱑⰾⱁ ⱄⱏⰴⱑⰾⰰ ⱁ ⰿⱐⱀⱑ.

ⰲⱐⱄⰵⰳⰴⰰ ⰱⱁ ⱀⰻⱎⱅⱔⱗ ⰻⰿⰰⱅⰵ ⱄⱏ ⱄⱁⰱⱁⱙ. ⰺ ⰵⰳⰴⰰ ⱈⱁⱋⰵⱅⰵ ⰿⱁⰶⰵⱅⰵ ⰻⰿⱏ ⰴⱁⰱⱃⱁ ⱅⰲⱁⱃⰻⱅⰻ. ⰰ ⰿⰵⱀⰵ ⱀⰵ ⰲⱐⱄⰵⰳⰴⰰ ⰻⰿⰰⱅⰵ.

ⰵⰶⰵ ⰻⰿⱑ ⱄⰻ ⱄⱏⱅⰲⱁⱃⰻ :: Ⰲⰰⱃⰻⰾⰰ ⰵⱄⱅⱏ ⱂⱁⱈⱃⰻⰸⰿⰻⱅⰻ ⱅⱑⰾⱁ ⰿⱁⰵ ⱀⰰ ⱂⱁⰳⱃⰵⰱⰵⱀⰻⰵ.

ⰰⰿⰻⱀⱐ ⰳⰾ҃ⱙ ⰲⰰⰿⱏ. ⰻⰴⰵⰶⰵ ⰽⱁⰾⰻⰶⱏⰴⱁ ⱂⱃⱁⱂⱁⰲⱑⰴⰰⱀⱁ ⰱⱘⰴⰵⱅⱏ ⰵⰲⱀ҃ⰼⰾⰻⰵ ⱄⰵ. ⰲⱐ ⰲⱐⱄⰵⰿⱐ ⰿⰻⱃⱑ. ⰻ ⰵⰶⰵ ⱄⱏⱅⰲⱁⱃⰻ ⱄⰻ. ⰳⰾ҃ⰰⱀⱁ ⰱⱘⰴⰵⱅⱏ ⰲⱏ ⱂⰰⰿⱔⱅⱐ ⱗ҅ ::

ⰺⱓⰴⰰ ⰻⱄⰽⰰⱃⰻⱁⱅⱏⱄⰽⱏⰹ ⰵⰴⰻⱀⱏ ⱁⱅⱏ ⱁⰱⱁⱓ ⱀⰰ ⰴⰵⱄⱔⱅⰵ. ⰺⰴⰵ ⰽⱏ ⰰⱃⱈⰻⰵⱃⰵⱁⰿⱏ ⰴⰰ ⰻ ⱂⱃⱑⰴⰰⱄⱅⱏ ⰻⰿⱏ.

ⱁⱀⰻ ⰶⰵ ⱄⰾⱏⰹⱎⰰⰲⱏⱎⰵ ⰲⱏⰸⰴⱃⰰⰴⱁⰲⰰⱎⱔ ⱄⱔ. ⰺ ⱁⰱⱑⱋⰰⱎⱔ ⰵⰿⱆ ⱄⱏⱃⰵⰱⱃⱐⱀⰻⰽⱏⰹ ⰴⰰⱅⰻ. ⰻ ⰻⱄⰽⰰⰰⱎⰵ ⰽⰰⰽⱁ ⰻ ⰲⱏ ⱂⱁⰴⱁⰱⱏⱀⱁ ⰲⱃⱑⰿⱔ ⱂⱃⱑⰴⰰⱄⱅⱏ.

ⰻ ⰲⱏ ⱂⱃⱏⰲⱏⰹ ⰴⱐⱀⱐ ⱁⱂⱃⱑⱄⱀⱐⰽⱏ. ⰵⰳⰴⰰ ⱂⰰⱄⱈⱘ ⰶⱐⱃⱑⰰⱈⱘ. ⰳⰾ҃ⰰⱎⱔ ⰵⰿⱆ ⱆⱍⰵⱀⰻⱌⰻ ⱄⰲⱁⰻ ⰽⱏⰴⰵ ⱈⱁⱎⱅⰵⱎⰻ ⱎⰵⰴⱏⱎⰵ ⱆⰳⱁⱅⱁⰲⰻⰿⱏ ⰴⰰ ⱑⱄⰻ ⱂⰰⱄⱈⱘ.

ⰺ ⱂⱁⱄⱏⰾⰰ ⰴⱏⰲⰰ ⱁⱅⱏ ⱆⱍⰵⱀⰻⰽⱏ ⱄⰲⱁⰻⱈⱏ. ⰻ ⰳⰾ҃ⰰ ⰻⰿⰰ ⰻⰴⱑⱅⰰ ⰲⱏ ⰳⱃⰰⰴⱏ ⰻ ⱄⱏⱃⱔⱎⱅⰵⱅⰰ ⰲⱏⰹ ⱍⰾⰲ҃ⰽⱏ. ⰲⱏ ⱄⰽⱘⰴⱐⰾⱐⱀⰻⱌⱑ ⰲⱁⰴⱘ ⱀⱁⱄⱔ. ⱂⱁ ⱀⰵⰿⱐ ⰻⰴⱑⱅⰰ.

ⰺ҅ ⰻⰴⰵⰶⰵ ⰰⱎⱅⰵ ⰲⱏⱀⰻⰴⰵⱅⱏ ⱃⱐⱌⱑⱅⰰ ⰳⱀ҃ⱆ ⰴⱁⰿⱆ. ⱑⰽⱁ ⱆⱍⰻⱅⰵⰾⱐ ⰳⰾ҃ⱅⱏ. ⰽⱏⰴⰵ ⰵⱄⱅⱏ ⱁⰱⰻⱅⱑⰾⱐ ⰻⰴⰵⰶⰵ ⱂⰰⱄⱈⱘ ⱄⱏ ⱆⱍⰵⱀⰻⰽⱏⰹ ⱄⰲⱁⰻⰿⰻ ⱄⱏⱀⱑⰿⱏ.

ⰺ ⱅⱏ ⰲⰰⰿⰰ ⱂⱁⰽⰰⰶⰵⱅⱏ ⰳⱁⱃⱐⱀⰻⱌⱘ ⰲⰵⰾⰻⱙ. ⱂⱁⱄⱅⱏⰾⰰⱀⱘ ⰳⱁⱅⱁⰲⱘ. ⱅⱆ ⱆⰳⱁⱅⱁⰲⰰⰻⱅⰰ ⱀⰰⰿⱏ.

ⰺ ⰻⰸⰻⰴⰵⱅⰵ ⱆⱍⰵⱀⰻⰽⰰ ⰵⰳⱁ ⰻ ⱂⱃⰻⰴⰵⱅⰵ ⰲⱏ ⰳⱃⰰⰴⱏ. ⰻ ⱁⰱⱃⱑⱅⰵⱅⰵ ⱑⰽⱁⰶⰵ ⱃⰵⱍⰵ ⰻⰿⰰ. ⰻ ⱆⰳⱁⱅⱁⰲⰰⱄⱅⰵ ⱂⰰⱄⱈⱘ ::

ⰺ ⰲⰵⱍⰵⱃⱆ ⰱⱏⰹⰲⱏⱎⱆ ⱂⱃⰻⰴⰵ ⱄⱏ ⱁⰱⱑⰿⰰ ⱀⰰ ⰴⰵⱄⱔⱅⰵ.

ⰺ ⰲⱏⰸⰾⰵⰶⱔⱎⱅⰵⰿⱏ ⰻⰿⱏ. ⰺ ⱑⰴⱘⱎⱅⰵⰿⱏ ⱃⰵ{ⱃⰵ}ⱍⰵ ⰻⱄ҃ⱏ. ⰰⰿⰻⱀ ⰳⰾ҃ⱙ ⰲⰰⰿⱏ. ⱑⰽⱁ ⰵⰴⰻⱀⱏ ⱁⱅⱏ ⰲⰰⱄⱏ ⱂⱃⱑⰴⰰⱄⱅⱏ ⰿⱔ. ⱑⰴⱏⰹ ⱄⱏ ⰿⱏⱀⱁⱙ ::

Ⱉⱀⰻ ⰶⰵ ⱀⰰⱍⱔⱄⱔ ⱄⰽⱃⱏⰱⱑⱅⰻ ⰻ ⱅⱘⰶⰻⱅⰻ. ⰺ ⰳⰾ҃ⰰⱅⰻ ⰵⰿⱆ ⰵⰴⰻⱀⱏ ⱂⱁ ⰵⰴⰻⱀⱁⰿⱆ. ⰵⰴⰰ ⰰⰸⱏ. ⰺ ⰴⱃⱆⰳⱏⰹⰻ ⰵⰴⰰ ⰰⰸⱏ.

ⱁⱀⱏ ⰶⰵ ⱁⱅⱏⰲⱑⱎⱅⰰⰲⱏ ⱃⰵⱍⰵ ⰻⰿⱏ. ⰵⰴⰻⱀⱏ ⱁⱅⱏ ⱁⰱⱁⱓ ⱀⰰ ⰴⰵⱄⱔⱅⰵ. ⱁⰿⱁⱍⰻⰻ ⱄⱏ ⰿⱏⱀⱁⱙ ⰲⱏ ⱄⱁⰾⰻⰾⱁ.

ⱄⱀ҃ⱏ ⰶⰵ ⱆⰱⱁ ⱍⰾⰲ҃ⱍⱄⰽⱏⰹ ⰻⰴⰵⱅⱏ ⱑⰽⱁⰶⰵ ⰵⱄⱅⱏ ⱂⰻⱄⰰⱀⱁ ⱁ ⱀⰵⰿⱐ :: Ⰳⱁⱃⰵ ⰶⰵ ⱍⰾⰲ҃ⰽⱆ ⱅⱁⰿⱆ ⰻⰿⱏⰶⰵ ⱄⱀ҃ⱏ ⱍⰾⰲ҃ⱍⱄⰽⱏⰹ ⱂⱃⱑⰴⰰⰰⱅⱏ ⱄⱔ. ⰴⱁⰱⱃⱁ ⰱⰻ ⰵⰿⱆ ⰱⱏⰹⰾⱁ. ⰰⱎⱅⰵ ⱀⰵ ⰱⰻ ⱃⱁⰴⰻⰾⱏ ⱄⱔ ⱍⰾⰲ҃ⱑⰽⱁⱅⱏ :: Ⰳⱁⱃⰵ ⰶⰵ ⱍⰾⰲ҃ⰽⱆ ⱅⱁⰿⱆ ⰻⰿⱏⰶⰵ ⱄⱀ҃ⱏ ⱍⰾⰲ҃ⱍⱄⰽⱏⰹ ⱂⱃⱑⰴⰰⰰⱅⱏ ⱄⱔ. ⰴⱁⰱⱃⱁ ⰱⰻ ⰵⰿⱆ ⰱⱏⰹⰾⱁ. ⰰⱎⱅⰵ ⱀⰵ ⰱⰻ ⱃⱁⰴⰻⰾⱏ ⱄⱔ ⱍⰾⰲ҃ⱑⰽⱁⱅⱏ ::

Ⰺ ⱑⰴⱘⱎⱅⰵⰿⱏ ⰻⰿⱏ ⱂⱃⰻⰵⰿⱏ ⰻⱄ҃ⱏ ⱈⰾⱑⰱⱏ. !ⰱⰾⰳⱄⰾⰲⰵⱎⱅⱏ ⱂⱃⱑⰾⱁⰿⰻ. ⰺ ⰴⰰⱄⱅⱏ ⰻⰿⱏ ⰻ ⱃⰵⱍⰵ. ⱂⱃⰻⰻⰿⱑⱅⰵ ⱄⰵ ⰵⱄⱅⱏ ⱅⱑⰾⱁ ⰿⱁⰵ.

ⰺ ⱂⱃⰻⰻⰿⱏ ⱍⰰⱎⱘ ⱈⰲⰰⰾⱘ ⰲⱏⰸⰴⰰⰲⱏ ⰴⰰⱄⱅⱏ ⰻⰿⱏ. ⰺ ⱂⰻⱎⱔ ⱁⱅⱏ ⱀⰵⱗ ⰲⱐⱄⰻ.

ⰻ ⱃⰵⱍⰵ ⰻⰿⱏ ⱄⰵ ⰵⱄⱅⱏ ⰽⱃⱏⰲⱐ ⰿⱁⱑ ⱀⱁⰲⰰⰰⰳⱁ ⰸⰰ{ⰲⰰ}ⰲⱑⱅⰰ. ⱂⱃⱁⰾⰻⰲⰰⰵⰿⰰ ⰸⰰ ⰿⱏⱀⱁⰳⱏⰹ ::

Ⰰⰿⰻⱀⱐ ⰶⰵ ⰳⰾ҃ⱙ ⰲⰰⰿⱏ. ⱑⰽⱁ ⱓⰶⰵ ⱀⰵ ⰻⰿⰰⰿⱏ ⱂⰻⱅⰻ ⱁⱅⱏ ⱂⰾⱁⰴⰰ ⰾⱁⰸⱏⱀⰰⰰⰳⱁ. ⰴⱁ ⱅⱁⰳⱁ ⰴⱐⱀⰵ ⰵⰳⰴⰰ ⱂⱐⱙ ⰻⱀⱁ ⰲⱏ ⱌⱄ҃ⱃⱄⱅⰲⰻⰻ ⰱⰶ҃ⰻⰻ.

ⰺ ⰲⱏⱄⱂⱑⰲⱏⱎⰵ ⰻⰸⰻⰴⱘ ⰲⱏ ⰳⱁⱃⱘ ⰵⰾⰵⱁⱀⱏⱄⰽⱘ ::

ⰺ҅ ⰳⰾ҃ⰰ ⰻⰿⱏ ⰻⱄ҃ⱏ ⱑⰽⱁ ⰲⱐⱄⰻ ⱄⱏⰱⰾⰰⰸⱀⰻⱅⰵ ⱄⱔ ⱁ ⰿⱐⱀⱑ ⰲⱐ ⱄⰻⱙ ⱀⱁⱎⱅⱏ. ⱂⰻⱄⰰⱀⱁ ⰱⱁ ⰵⱄⱅⱏ. Ⱂⱁⱃⰰⰶⱘ ⱂⰰⱄⱅⱏⰹⱃⱑ. ⰻ ⱁⰲⱏⱌⱔ ⱃⰰⰸⰱⱑⰳⱀⱘⱅⱏ ⱄⱔ.

Ⱀⱏ ⱂⱁ ⱅⱁⰿⱐ ⰵⰳⰴⰰ ⰲⱐⱄⰽⱃⱐⱄⱀⱘ ⰲⰰⱃⱙ ⰲⱏⰹ ⰲⱏ ⰳⰰⰾⰻⰾⰵⰻ.

ⱂⰵⱅⱃⱏ ⰶⰵ ⱃⰵⱍⰵ ⰵⰿⱆ. ⰻ ⰰⱎⱅⰵ ⰲⱐⱄⰻ ⱄⱏⰱⰾⰰⰸⱀⱔⱅⱏ ⱄⱔ ⱀⱏ ⱀⰵ ⰰⰸⱏ.

ⰺ ⰳⰾ҃ⰰ ⰵⰿⱆ ⰻⱄ҃ⱏ. Ⰰⰿⰻⱀⱐ ⰳⰾ҃[ⱙ] ⱅⰻ. ⱑⰽⱁ ⱅⱏⰹ ⰴⱐⱀⰵⱄⱐ ⰲⱐ ⱄⱐⱙ ⱀⱁⱎⱅⱏ. ⱂⱃⱑⰶⰴⰵ ⰴⰰⰶⰵ ⰲⱏⱅⱁⱃⰻⱌⰵⱙ. ⰽⱁⰽⱁⱅⱏ ⱀⰵ !ⰲⱏⰸⰳⰾⰰⱄⰻⱅⱏ. ⱅⱃⰻ ⰽⱃⰰⱅⱏⰹ ⱁⱅⱏⰲⱃⱏⰶⰵⱎⰻ ⱄⱔ ⰿⰵⱀⰵ.

ⱁⱀⱏ ⰶⰵ ⰻⰸⰾⰻⱈⰰ ⰳⰾ҃ⰰⰰⱎⰵ ⱂⰰⱍⰵ. ⰰⱎⱅⰵ ⰿⰻ ⱄⱔ ⰽⰾⱓⱍⰻⱅⱏ ⱄⱏ ⱅⱁⰱⱁⱙ ⱆⰿⱐⱃⱑⱅⰻ. ⱀⰵ ⱁⱅⱏⰲⱃⱏⰳⱘ ⱄⱔ ⱅⰵⰱⰵ. ⱅⰰⰽⱁⰶⰴⰵ ⰻ ⰲⱐⱄⰻ ⰳⰾ҃ⰰⰰⱈⱘ.

Ⱂⱃⰻⰴⱘ ⰲⱐ ⰲⰵⱄⱐ ⰵⰻⰶⰵ ⰻⰿⱔ ⰼⰵⱅⱏⱄⰻⰿⰰⱀⰻ. ⰺ ⰳⰾ҃ⰰ ⱆⱍⰵⱀⰻⰽⱁⰿⱏ ⱄⰲⱁⰻⰿⱏ. ⱄⱔⰴⱑⱅⰵ ⱄⱏⰴⰵ ⰴⱁⱀⱐⰴⰵⰶⰵ ⱎⰵⰴⱏ ⱂⱁⰿⱁⰾⱙ ⱄⱔ.

ⰺ ⱂⱁⱗⱅⱏ ⱂⰵⱅⱃⰰ ⰻ ⰻⱑⰽⱁⰲⰰ. ⰺ ⱁⰰⱀⰰ ⱄⱏ ⱄⱁⰱⱁⱙ. ⰻ ⱀⰰⱍⱔⱅⱏ ⱆⰶⰰⱄⰰⱅⰻ ⱄⱔ ⰻ ⱅⱘⰶⰻⱅⰻ.

ⰺ ⰳⰾ҃ⰰ ⰻⰿⱏ ⱂⱃⰻⱄⰽⱃⱏⰱⱏⱀⰰ ⰵⱄⱅⱏ ⰴⱎ҃ⰰ ⰿⱁⱑ ⰴⱁ ⱄⱏⰿⱃⱏⱅⰻ. ⱂⱁⰶⰻⰴⱑⱅⰵ ⱄⱏⰴⰵ ⰻ ⰱⱐⰴⰻⱅⰵ.

ⰻ ⱂⱃⱑⱎⰵⰴⱏ ⰿⰰⰾⱁ ⱂⰰⰴⰵ ⱀⰰ ⰸⰵⰿⰾⰻ. ⰻ ⰿⱁⰾⱑⰰⱎⰵ ⱄⱔ ⰴⰰ ⰰⱎⱅⰵ ⰲⱏⰸⰿⱁⰶⱏⱀⱁ ⰵⱄⱅⱏ ⰿⰻⰿⱁ ⰻⰴⰵⱅⱏ ⱁⱅⱏ ⱀⰵⰳⱁ ⱍⰰⱄⱏ.

ⰺ ⰳⰾ҃ⰰⱎⰵ ⰰⰲⰲⰰ ⱁⱅ҃ⱌⱏ. ⰲⱏⱄⱑ ⰲⱏⰸⰿⱁⰶⱏⱀⰰ ⱅⰵⰱⱑ ⱄⱘⱅⱏ. ⰿⰻⰿⱁ ⱀⰵⱄⰻ ⱍⰰⱎⱘ ⱄⰻⱙ ⱁⱅⱏ ⰿⰵⱀⰵ :: Ⱀⱏ ⱀⰵ ⱑⰽⱁ ⰰⰸⱏ ⱈⱁⱎⱅⱘ ⱀⱏ ⰵⰶⰵ ⱅⱏ.

ⰺ ⱂⱃⰻⰴⰵ ⰺ ⱁⰱⱃⱑⱅⰵ ⱗ ⱄⱏⱂⱔⱎⱅⱔ. ⰻ ⰳⰾ҃ⰰ ⱂⰵⱅⱃⱁⰲⰻ. ⱄⰻⰿⱁⱀⰵ ⱄⱏⱂⰻⱎⰻ ⰾⰻ. ⱀⰵ ⰲⱏⰸⰿⱁⰶⰵ ⰵⰴⰻⱀⱁⰳⱁ ⱍⰰⱄⰰ ⱂⱁⰱⱏⰴⱑⱅⰻ.

ⰱⱐⰴⰻⱅⰵ ⰻ ⰿⱁⰾⰻⱅⰵ ⱄⱔ ⰴⰰ ⱀⰵ ⰲⱐⱀⰻⰴⰵⱅⰵ ⰲⱏ ⱀⰰⱂⰰⱄⱅⱐ. ⰴⱈ҃ⱏ ⰱⱁ ⰵⱄⱅⱏ ⰱⱐⰴⱃⱐ ⰰ ⱂⰾⱏⱅⱏ ⱀⰵⰿⱁⱎⱅⱏⱀⰰ.

ⰺ ⱂⰰⰽⱏⰹ ⱎⰵⰴⱏ ⱂⱁⰿⱁⰾⰻ ⱄⱔ ⱅⱁⰶⰴⰵ ⱄⰾⱁⰲⱁ ⱃⰵⰽⱏ.

ⰻ ⰲⱏⰸⰲⱃⰰⱎⱅⱐ ⱄⱔ ⱁⰱⱃⱑⱅⰵ ⱗ ⱂⰰⰽⱏⰹ ⱄⱏⱂⱔⱎⱅⱔ. ⰱⱑⰰⱎⰵⱅⰵ ⰱⱁ ⰻⰿⱏ ⱁⱍⰻ ⱅⱔⰳⱁⱅⱐⱀⱑ. ⰺ ⱀⰵ ⱆⰿⱑⱈⱘ ⱍⱏⱅⱁ ⰱⱘ ⱁⱅⱏⰲⱑⱎⱅⰰⰾⰻ ⰵⰿⱆ ::

Ⰺ ⱂⱃⰻⰴⰵ ⱅⱃⰵⱅⰻⰻⱌⰻ. ⰻ ⰳⰾ҃ⰰ ⰻⰿⱏ. ⱄⱏⱂⰻⱅⰵ ⱂⱃⱁⱍ ⰵ҅ ⰻ ⱂⱁⱍⰻⰲⰰⰻⱅⰵ. ⱂⱃⰻⱄⱂⱑ ⰽⱁⱀⱐⱍⰻⱀⰰ ⱂⱃⰻⰴⰵ ⱍⰰⱄⱏ. ⱄⰵ ⱂⱃⱑⰴⰰⰰⱅⱏ ⱄⱔ ⱄⱀ҃ⱏ ⱍⰾⰲ҃ⱍⱄⰽⱏⰹ ⰲⱏ ⱃⱘⱌⱑ ⰳⱃⱑⱎⱏⱀⰻⰽⱁⰿⱏ.

ⰲⱏⱄⱅⰰⱀⱑⱅⰵ ⰻⰴⱑⰿⱏ. ⱄⰵ ⱂⱃⱑⰴⰰⱗⰻ ⰿⱔ ⱂⱃⰻⰱⰾⰻⰶⰻ ⱄⱔ

ⰺ ⰰⰱⰻⰵ ⰵⱎⱅⰵ ⰵⰿⱆ ⰳⰾ҃ⱙⱋⱓ. ⱂⱃⰻⰴⰵ ⰻⱓⰴⰰ ⰵⰴⰻⱀⱏ ⱁⱅⱏ ⱁⰱⱁⱙ ⱀⰰ ⰴⰵⱄⱔⱅⰵ. ⰻ ⱄⱏ ⱀⰻⰿⱐ ⱀⰰⱃⱁⰴⱏ ⰿⱏⱀⱁⰳⱏ. ⱄⱏ ⱁⱃⱘⰶⰻⰻ ⰻ ⰴⱃⱏⰽⱁⰾⱐⰿⰻ. ⱁⱅⱏ ⰰⱃⱈⰻⰵⱃⰵⰻ ⰻ ⰽⱏⱀⰻⰶⱏⱀⰻⰽⱏ ⰻ ⱄⱅⰰⱃⰵⱌⱏ ::

Ⰴⰰⱄⱅⱏ ⰶⰵ ⱂⱃⱑⰴⰰⱗⰻ ⰵⰳⱁ ⰸⱀⰰⰿⰵⱀⰻⰵ ⰻⰿⱏ ⰳⰾ҃ⱔ. ⰵⰳⱁⰶⰵ ⰰⱎⱅⰵ ⰾⱁⰱⱏⰶⱘ ⰻⰿⱑⱅⰵ ⰻ ⱅⱏ ⰵⱄⱅⱏ. ⰻ ⰲⰵⰴⱑⱅⰵ ⱄⱏⱈⱃⰰⱀⱐⱀⱁ.

ⰺ ⱂⱃⰻⱎⰵⰴⱏ ⰰⰱⰻⰵ ⱂⱃⰻⱄⱅⱘⱂⱐ ⰽⱏ ⱀⰵⰿⱆ ⰳⰾ҃ⰰ. ⱃⰰⰲⰲⰻ ⱃⰰⰲⰲⰻ. ⰺ ⱁⰱⰾⱁⰱⱏⰹⰸⰰ ⰻ.

ⱁⱀⰻ ⰶⰵ ⰲⱏⰸⰾⱁⰶⰻⱎⱔ ⱃⱘⱌⱑ ⱀⰰ ⱀⱐ ⰻ ⱗⱄⱔ ⰻ҅.

ⰵⰴⰻⱀⱏ ⰶⰵ ⱁⱅⱏ ⱄⱅⱁⱗⱎⱅⰻⱈⱏ. ⰺⰸⰲⰾⱏⰽⱏ ⱀⱁⰶⱏ ⱆⰴⰰⱃⰻ ⱃⰰⰱⰰ ⰰⱃⱈⰻⰵⱃⰵⱁⰲⰰ. ⰺ ⱆⱃⱑⰸⰰ ⰵⰿⱆ ⱆⱈⱁ.

ⰺ ⱁⱅⱏⰲⱑⱎⱅⰰⰲⱏ ⰻⱄ҃ⱏ ⱃⰵⱍⰵ ⰻⰿⱏ. ⱑⰽⱁ ⱀⰰ ⱃⰰⰸⰱⱁⰻⱀⰻⰽⰰ ⰾⰻ ⰻⰸⰻⰴⰵⱅⰵ ⱄⱏ ⱁⱃⱘⰶⱐⰵⰿⱐ ⰻ ⰴⱃⱏⰽⱁⰾⱐⰿⰻ ⱗⱅⰻ ⰿⱔ.

ⱂⱁ ⰲⱐⱄⱔ ⰴⱐⱀⰻ ⰱⱑⱈⱏ ⰲⱏ ⰲⰰⱄⱏ ⱆⱍⱔ ⰲⱏ !ⱌⱃⰽⰲⰵ ⰻ ⱀⰵ ⱗⱄⱅⰵ ⰿⰵⱀⰵ. ⱀⱏ ⰴⰰ ⱄⱏⰱⱘⰴⱘⱅⱏ ⱄⱔ ⰽⱏⱀⰻⰳⱏⰹ.

ⰺ ⱁⱄⱅⰰⰲⱐⱎⰵ ⰻ ⰲⱐⱄⰻ ⰱⱑⰶⰰⱎⱔ.

ⰺ ⰵⰴⰻⱀⱏ ⱓⱀⱁⱎⰰ ⰵⱅⰵⱃⱏ ⱂⱁ ⱀⰵⰿⱐ ⰻⰴⰵ. ⱁⰴⱑⱀⱏ ⰲⱏ ⱂⰾⰰⱎⱅⰰⱀⰻⱌⱘ ⱀⰰⰳⱏ. ⰺ ⱗⱄⱔ ⰻ ⱓⱀⱁⱎⱔ.

ⱁⱀⱏ ⰶⰵ ⱁⱄⱅⰰⰲⱐ ⱂⰾⰰⱎⱅⰰⱀⰻⱌⱘ. ⱀⰰⰳⱏ ⰱⱑⰶⰰ ⱁⱅⱏ ⱀⰻⱈⱏ.

ⰺ ⰲⱑⱄⱔ ⰻⱄ҃ⰰ ⰽⱏ ⰰⱃⱈⰻⰵⱃⰵⱁⰲⰻ. ⰺ ⱄⱏⱀⰻⰴⱘ ⱄⱔ ⰽⱏ ⱀⰵⰿⱆ ⰲⱏⱄⰻ ⰰⱃⱈⰻⰵⱃⰵⰻ ⰺ҅ ⱄⱅⰰⱃⱐⱌⰻ ⰻ ⰽⱏⱀⰻⰶⱏⱀⰻⱌⰻ.

ⰺ ⱂⰵⱅⱃⱏ ⰺ҅ⰸⰴⰰⰾⰵⱍⰵ ⰲⱏ ⱄⰾⱑⰴⱏ ⰵⰳⱁ ⰻⰴⰵ. ⰴⱁ ⰲⱏⱀⱘⱅⱃⱐ ⰲⱏ ⰴⰲⱁⱃⱏ ⰰⱃⱈⰻⰵⱃⰵⱁⰲⱏ ⰻ ⰱⱑ ⱄⱑⰴⱔ ⱄⱏ ⱄⰾⱆⰳⰰⰿⰻ ⰻ ⰳⱃⱑⱗ ⱄⱔ ⱂⱃⰻ ⱄⰲⱑⱎⱅⰻ.

ⰰⱃⱈⰻⰵⱃⰵⰻ ⰶⰵ ⰻ ⰲⰵⱄⱐ ⱄⱏⱀⰵⰿⱏ. ⰺⱄⰽⰰⰰⱈⱘ ⱀⰰ ⰻⱄ҃ⰰ ⱄⱏⰲⱑⰴⱑⱅⰵⰾⱐⱄⱅⰲⰰ ⰴⰰ ⰻ ⱆⰱⱐⱙⱅⱏ. ⰺ ⱀⰵ ⱁⰱⱃⱑⱅⰰⰰⱈⱘ.

ⰿⱏⱀⱁⰷⰻ ⰱⱁ ⰾⱏⰶⰵ ⱄⱏⰲⱑⰴⱑⱅⰵⰾⱐⱄⱅⰲⱁⰲⰰⰰⱈⱘ ⱀⱐ!ⱀ. ⰺ ⱀⰵ ⰱⱑⰰⱈⱘ ⱃⰰⰲⱏⱀⰰ ⱄⱏⰲⱑⰴⱑⱅⰵⰾⱐⱄⱅⰲⰰ

Ⰺ ⰵⰴⰻⱀⰻ ⰲⱏⱄⱅⰰⰲⱏⱎⰵ ⰾⱏⰶⱘ ⱄⱏⰲⱑⰴⱑⱅⰵⰾⱐⱄⱅⰲⱁⰲⰰⰰⱈⱘ ⱀⰰ ⱀⱐ ⰳⰾ҃ⱎⱅⰵ.

ⱑⰽⱁ ⰿⱏⰹ ⱄⰾⱏⰹⱎⰰⱈⱁⰿⱏⰹ ⰻ ⰳⰾ҃ⱙⱎⱅⱐ. ⱑⰽⱁ ⰰⰸⱏ ⱃⰰⰸⱁⱃⱙ !ⱌⱃⰽⰲⱐ ⱄⰻⱙ ⱃⱘⰽⱁⱅⰲⱁⱃⰵⱀⱘⱙ. ⰺ ⱅⱃⱐⰿⰻ ⰴⱐⱀⱐⰿⰻ ⰻⱀⱘ ⱀⰵⱃⱘⰽⱁⱅⰲⱁⱃⰵⱀⱘ ⱄⱏⰸⰻⰶⰴⱘ.

ⰺ ⱅⰰⰽⱁ ⰶⰵ ⱀⰵ ⰱⱑ ⱃⰰⰲⱏⱀⱁ ⱄⱏⰲⱑⰴⱑⱅⰵⰾⱐⱄⱅⰲⱁ ⰻⰿⱏ.

ⰺ ⰲⱏⱄⱅⰰⰲⱏ ⰰⱃⱈⰻⰵⱃⰵⰻ ⱂⱁ ⱄⱃⱑⰴⱑ ⰲⱏⱂⱃⱁⱄⰻ ⰻⱄ҃ⰰ ⰳⰾ҃ⱔ ⱀⰵ ⱁⱅⱏⰲⱑⱎⱅⰰⰲⰰⰵⱎⰻ ⰾⰻ ⱀⰻⱍⰵⱄⱁⰶⰵ. ⱍⱏⱅⱁ ⱄⰻⰻ ⱀⰰ ⱅⱔ ⱄⱏⰲⱑ[ⰴⱑ]ⱅⰵⰾⱐⱄⱅⰲⱆⱙⱅⱏ.

ⱁⱀⱏ ⰶⰵ ⰿⰾⱏⱍⰰⰰⱎⰵ. ⰺ ⱀⰻⱍⱐⱄⱁⰶⰵ ⱀⰵ ⱁⱅⱏⰲⱑⱎⱅⰰⰰⱎⰵ. Ⱂⰰⰽⱏⰹ ⰰⱃⱈⰻⰵⱃⰵⰻ ⰲⱏⱂⱃⱁⱄⰻ ⰻ ⰻ ⰳⰾ҃ⰰ ⰵⰿⱆ. ⱅⱏⰹ ⰾⰻ ⰵⱄⰻ !ⱈⱏ ⱄⱀ҃ⱏ !ⰱⰾⰳⱄⰲⱀⰰⰰⰳⱁ.

ⰺⱄ҃ⱏ ⰶⰵ ⱃⰵⱍⰵ ⰰⰸⱏ ⰵⱄⰿⱏ. ⰺ ⱆⰸⱐⱃⰻⱅⰵ ⱄⱀ҃ⰰ !ⱍⰾⱄⰽⰰⰰⰳⱁ. ⱁ !ⰴⰵⱄⱀⱘⱙ ⱄⱑⰴⱔⱎⱅⰰ ⱄⰻⰾⱏⰹ. ⰺ ⰳⱃⱔⰴⱘⱎⱅⰰ ⱄⱏ ⱁⰱⰾⰰⰽⱏⰹ ⱀⰱ҃ⱄⱄⰽⱏⰹⰻⰿⰻ.

ⰰⱃⱈⰻⰵⱃⰵⰻ ⰶⰵ ⱃⰰⱄⱅⱃⱏⰸⰰⰲⱏ ⱃⰻⰸⱏⰻ ⱄⰲⱁⱗ ⰳⰾ҃ⰰ. ⱍⱅⱁ ⰵⱎⱅⰵ ⱅⱃⱑⰱⱆⰵⰿⱏ ⱄⱏⰲⱑⰴⱑⱅⰵⰾⱐ.

ⱄⰾⱏⰹⱎⰰⱄⱅⰵ ⰲⰾⰰⱄⱇⰻⰿⰻⱙ ⰵⰳⱁ. ⱍⱅⱁ ⰲⰰⰿⱏ ⱄⱔ ⰰⰲⰾⱑⰰⱅⱏ. ⱁⱀⰻ ⰶⰵ ⰲⱐⱄⰻ ⱁⱄⱘⰴⰻⱎⱔ ⰻ ⱂⱁⰲⰻⱀⱏⱀⱆ ⰱⱏⰹⱅⰻ ⱄⱏⰿⱃⱏⱅⰻ.

ⰺ ⱀⰰⱍⱔⱄⱔ ⰵⰴⰻⱀⰻ ⱂⰾⱐⰲⰰⱅⰻ ⱀⰰ ⱀⱐ. ⰺ ⱂⱃⰻⰽⱃⱏⰹⰲⰰⱅⰻ ⰾⰻⱌⰵ ⰵⰳⱁ ⰻ ⰿⱘⱍⰻⱅⰻ ⰻ. ⰺ ⰳⰾ҃ⰰⱅⰻ ⰵⰿⱆ. ⱂⱃⱁⱃⱐⱌⰻ ⱀⰰⰿⱏ !ⱈⰵ ⰽⱅⱁ ⰵⱄⱅⱏ ⱆⰴⰰⱃⰵⰻ ⱅⱔ. ⰺ ⱄⰾⱆⰳⱏⰹ ⰱⰻⱙⱎⱅⰵ ⰸⰰ ⰾⰰⱀⰻⱅⱘ ⱂⱃⱑⱗⱄⱔ ⰻ ::

ⰺ ⱄⱘⱎⱅⱆ ⱂⰵⱅⱃⱁⰲⰻ ⱀⰻⰸⱆ ⱀⰰ ⰴⰲⱁⱃⱑ. ⱂⱃⰻⰴⰵ ⰵⰴⰻⱀⰰ ⱁⱅⱏ ⱃⰰⰱⱏⰹⱀⱐ ⰰⱃⱈⰻⰵⱃⰵⱁⰲⱏ.

ⰺ ⰲⰻⰴⱑⰲⱏⱎⰻ ⱂⰵⱅⱃⰰ ⰳⱃⱑⱙⱎⱅⰰ ⱄⱔ. ⰲⱐⰸⱐⱃⱑⰲⱏⱎⰻ ⱀⰰ ⱀⱐ ⰳⰾ҃ⰰ. ⰺ҅ ⱅⱏⰹ ⱄⱏ ⱀⰰⰸⰰⱃⱑⱀⰻⱀⱁⰿⱐ ⰻⱄ҃ⰿⱏ ⰱⱑ.

ⱁ҅ⱀⱏ ⰶⰵ ⱁⱅⱏⰲⱃⱏⰶⰵ ⱄⱔ ⰳⰾ҃ⱔ. ⱀⰵ ⱆⰿⱑⱙ ⱀⰻ ⱄⱏⰲⱑⰿⱐ ⱍⱅⱁ ⱅⱏⰹ ⰳⰾ҃ⱎⰻ. ⰺ ⰻⰸⰻⰴⰵ ⰲⱁⱀⱏ ⱀⰰ ⱂⱃⱑⰴⱏⰴⰲⱁⱃⰻⰵ. ⰺ ⰽⱁⰽⱁⱅⱏ ⰲⱐⱄⱂⱑⱅⱏ.

ⰺ ⰲⰻⰴⱑⰲⱏⱎⰻ ⰻ ⱃⰰⰱⱏⰹⱀⰻ ⱂⰰⰽⱏⰹ ⱀⰰⱍⱔⱅⱏ ⰳⰾ҃ⰰⱅⰻ ⰽⱏ ⱄⱅⱁⱗⱎⱅⰻⰻⰿⱏ. ⱑⰽⱁ ⱄⱐ ⰵⱄⱅⱏ ⱁⱅⱏ ⱀⰻⱈⱏ.

ⱁⱀⱏ ⰶⰵ ⱂⰰⰽⱏⰹ ⱁⱅⱏⰿⰵⱅⰰⰰⱎⰵ ⱄⱔ. ⰺ ⱀⰵ ⱂⱁ ⰿⱏⱀⱁⰳⱆ ⱂⰰⰽⱏⰹ ⱄⱅⱁⱗⱋⰵⰻ. ⰳⰾ҃ⰰⰰⱈⱘ ⱂⰵⱅⱃⱁⰲⰻ. ⰲⱏⰹ ⰻⱄⱅⰻⱀⱘ ⱁⱅⱏ ⱀⰻⱈⱏ ⰵⱄⰻ. ⰺⰱⱁ ⰳⰰⰾⰻⰾⱑⰰⱀⰻⱀⱏ ⰵⱄⰻ. ⰺ ⰱⰵⱄⱑⰴⰰ ⱅⰲⱁⱑ ⱂⱁⰴⱁⰱⰻⱅⱏ ⱄⱔ.

ⱁⱀⱏ ⰶⰵ ⱀⰰⱍⱔⱅⱏ ⱃⱁⱅⰻⱅⰻ ⱄⱔ ⰻ ⰽⰾⱔⱅⰻ ⱄⱔ. ⱑⰽⱁ ⱀⰵ ⰲⱑⰿⱏ ⱍⰾⰲ҃ⰽⰰ ⱄⰵⰳⱁ ⰵⰳⱁⰶⰵ ⰳⰾ҃ⱅⰵ.

ⰺ ⰲⱏⱅⱁⱃⰻⱌⰵⱙ ⰽⱁⰽⱁⱅⱏ ⰲⱏⱄⱂⱑⱅⱏ. ⰺ ⱂⱁⰿⱑⱀⱘ ⱂⰵⱅⱃⱏ ⰳⰾ҃ⱏ ⰻⰶⰵ ⱃⰵⱍⰵ ⰵⰿⱆ ⰻⱄ҃ⱏ. ⱂⱃⱑⰶⰴⰵ ⰴⰰⰶⰵ ⰽⱁⰽⱁⱅⱏ ⱀⰵ !ⰲⱏⰸⰳⰾⰰⱄⰻⱅⱏ ⰴⱏⰲⰰ ⰽⱃⰰⱅⱏⰹ. ⱁⱅⱏⰲⱃⱏⰶⰵⱎⰻ ⱄⱔ ⰿⰵⱀⰵ ⱅⱃⰻ ⰽⱃⰰⱅⱏⰹ. ⰺ ⱀⰰⱍⱔⱅⱏ ⱂⰾⰰⰽⰰⱅⰻ ⱄⱔ.