ЕВАНГЕЛИЕ ЕЖЕ Ѿ МАРЪКА
13:1
Ⰺ ⰻⱄⱈⱁⰴⱔⱎⱅⱓ ⰵⰿⱆ ⱁⱅⱏ !ⱌⱃⰽⰲⰵ. ⰳⰾ҃ⰰ ⰵⰿⱆ ⰵⰴⰻⱀⱏ ⱁⱅⱏ ⱆⱍⰵⱀⰻⰽⱏ ⱄⰲⱁⰻⱈⱏ. ⱆⱍⰻⱅⰵⰾⱓ ⰲⰻⰶⰴⱏ ⰽⰰⰽⱁⰲⱁ ⰽⰰⰿⰵⱀⰻⰵ ⰻ ⰽⰰⰽⱁⰲⱁ ⰸⱏⰴⰰⱀⰻⰵ.
13:2
ⰺⱄ҃ ⰶⰵ ⱁⱅⱏⰲⱑⱎⱅⰰⰲⱏ ⱃⰵⱍⰵ ⰵⰿⱆ. ⰲⰻ[ⰴⰻ]ⱎⰻ ⰾⰻ ⰲⰵⰾⰻⰽⰰⰰ ⱄⰻ ⰸⱏⰴⰰⱀⰻⱑ. ⱀⰵ ⰻⰿⰰⱅⱏ ⱁⱄⱅⰰⱅⰻ ⱄⱐⰴⰵ ⰽⰰⰿⰵⱀⱐ ⱀⰰ ⰽⰰⰿⰵⱀⰻ. ⰺⰶⰵ ⱀⰵ ⰻⰿⰰⱅⱏ ⱃⰰⰸⱁⱃⰻⱅⰻ ⱄⱔ ::
13:3
Ⰺ ⱄⱑⰴⱔⱎⱅⱓ ⰵⰿⱆ ⱀⰰ ⰳⱁⱃⱑ ⰵⰾⰵⱁⱀⱏⱄⱌⱑ. ⱂⱃⱑⰿⱁ !ⱌⱃⰽⰲⰻ ⰲⱏⱂⱃⰰⱎⰰⰰⱈⱘ ⰻ ⰵⰴⰻⱀⱁⰳⱁ. ⱂⰵⱅⱃⱏ ⰻ ⰻⱑⰽⱁⰲⱏ. ⰺ ⰻⱁⰰⱀⱐ ⰻ ⰰⱀⱐⰴⱃⱑⰰ.
13:4
ⱃⱏⱌⰻ ⱀⰰⰿⱏ ⰽⱁⰳⰴⰰ ⱄⰵ ⰱⱘⰴⰵⱅⱏ. ⰺ ⰽⱁⰵ ⰱⱘⰴⰵⱅⱏ ⰸⱀⰰⰿⰵⱀⰻⰵ. ⰵⰳⰴⰰ ⰻⰿⱘⱅⱏ ⱄⱏⰽⱁⱀⱐⱍⰰⱅⰻ ⱄⱔ ⰲⱐⱄⱑ ⱄⰻ.
13:5
ⰺⱄ҃ ⰶⰵ ⱁⱅⱏⰲⱑⱎⱅⰰⰲⱏ ⱀⰰⱍⱔⱅⱏ ⰳⰾ҃ⰰⱅⰻ ⰻⰿⱏ. ⰱⰾⱓⰴⱑⱅⰵ ⱄⱔ ⰴⰰ ⱀⰵ ⰽⱅⱁ ⱂⱃⱑⰾⱐⱄⱅⰻⱅⱏ ⰲⰰⱄⱏ.
13:6
ⰿⱏⱀⱁⰸⰻ ⰱⱁ ⱂⱃⰻⰴⱘⱅⱏ ⰲⱏ ⰿⱁⰵ ⰻⰿⱔ ⰳⰾ҃ⱎⱅⰵ. ⱑⰽⱁ ⰰⰸⱏ ⰵⱄⰿⱏ ⰺ ⰿⱏⱀⱁⰳⱏⰹ ⱂⱃⱑⰾⱐⱄⱅⱔⱅⱏ ::
13:7
ⰵⰳⰴⰰ ⰶⰵ ⱆⱄⰾⱏⰹⱎⰻⱅⰵ ⰱⱃⰰⱀⰻ ⰻ ⱄⰾⱆⱈⱏⰹ ⰱⱃⰰⱀⰻⰻ. ⱀⰵ ⱆⰶⰰⱄⰰⰻⱅⰵ ⱄⱔ. ⱂⱁⰴⱁⰱⰰⰰⱅⱏ ⰱⱁ ⰱⱏⰹⱅⰻ. ⱀⱏ ⱀⰵ ⱆ ⰽⱁⱀⱐⱍⰻⱀⰰ.
13:8
ⰲⱏⱄⱅⰰⱀⰵⱅⱏ ⰱⱁ ⱗⰸⱏⰹⰽⱏ ⱀⰰ !ⱗⰸⰽⱏ. ⰺ ⱌⱄ҃ⱃⱄⱅⰲⱁ ⱀⰰ ⱌⱄ҃ⱃⱄⱅⰲⱁ. ⰺ ⰱⱘⰴⱘⱅⱏ ⱅⱃⱘⱄⰻ ⱂⱁ ⰿⱑⱄⱅⰰ. ⰺ ⰱⱘⰴⱘⱅⱏ ⰳⰾⰰⰴⰻ ⰻ ⰿⱔⱅⰵⰶⰻ.
13:9
ⱀⰰⱍⱔⰾⱁ ⰱⱁⰾⱑⰸⱀⰵⰿⱏ ⱄⰻ. Ⰱⰾⱓⰴⱑⱅⰵ ⰶⰵ ⰲⱏⰹ ⱄⱔ ⱄⰰⰿⰻ :: ⱂⱃⱑⰴⰰⰴⱔⱅⱏ ⰱⱁ ⰲⱏⰹ ⰲⱏ ⱄⱏⱀⱔⱅⰻⱑ. ⰺ ⱀⰰ ⱄⱏⱀⱏⰿⰻⱋⰻⱈⱏ ⰱⱐⰵⱀⰻ ⰱⱘⰴⰵⱅⰵ. ⰺ ⱂⱃⱑⰴⱏ {ⰲⱁⰵ}ⰲⱁⰵⰲⱁⰴⰰⰿⰻ ⰻ ⱂⱃⱑⰴⱏ ⱌⱄ҃ⱃⰻ ⱄⱅⰰⱀⰵⱅⰵ ⰿⰵⱀⰵ ⱃⰰⰴⰻ. ⰲⱏ ⱄⱏⰲⱑⰴⱑⱅⰵⰾⱐⱄⱅⰲⱁ ⰻⰿⱏ.
13:10
ⰺ ⰲⱏ ⰲⱐⱄⱑⱈⱏ ⱗⰸⱏⰹⱌⱑⱈⱏ. ⱂⱁⰴⱁⰱⰰⰰⱅⱏ ⱂⱃⱑⰶⰴⰵ ⱂⱃⱁⱂⱁⰲⱑⰴⰰⱅⰻ ⱄⱔ ⰵⰲⱀ҃ⰼⰾⰻⱓ ::
13:11
Ⰵⰳⰴⰰ ⰶⰵ ⰲⱁⰴⱔⱅⱏ ⰲⱏⰹ ⱂⱃⱑⰴⰰⱙⱎⱅⰵ ⱀⰵ ⱂⱐⱌⱑⱅⰵ ⱄⱔ ⱂⱃⱑⰶⰴⰵ ⱍⱅⱁ ⰲⱏⰸⰳⰾⰰⰳⱁⰾⰵⱅⰵ : {ⱀ} ⱀⰻ ⱂⱁⱆⱍⰰⰻⱅⰵ ⱄⱔ. ⱀⱏ ⰵⰶⰵ ⰰⱎⱅⰵ ⰴⰰⱄⱅⱏ ⱄⱔ ⰲⰰⰿⱏ ⰲⱏ ⱅⱏ ⱍⰰⱄⱏ ⱅⱁ ⰳⰾⰰⰳⱁⰾⰵⱅⰵ. ⱀⰵ ⰲⱏⰹ ⰱⱁ ⰱⱘⰴⰵⱅⰵ ⰳⰾⰰⰳⱁⰾⱙⱎⱅⰵⰻ. ⱀⱏ ⰴⱈ҃ⱏ ⱄⱅ҃ⱏⰹ.
13:12
ⱂⱃⱑⰴⰰⱄⱅⱏ ⰶⰵ ⰱⱃⰰⱅⱃⱏ ⰱⱃⰰⱅⱃⰰ ⱀⰰ ⱄⱏⰿⱃⱏⱅⱐ. ⰺ ⱁⱅ҃ⱌⱏ ⱍⱔⰴⱁ. ⰻ ⰲⱏⱄⱅⰰⱀⱘⱅⱏ ⱍⱔⰴⰰ ⱀⰰ ⱃⱁⰴⰻⱅⰵⰾⱔ. ⰺ ⱆⰱⱐⱙⱅⱏ ⱗ.
13:13
ⰻ ⰱⱘⰴⰵⱅⰵ ⱀⰵⱀⰰⰲⰻⰴⰻⰿⰻ ⰲⱐⱄⱑⰿⰻ ⰻⰿⰵⱀⰵ ⰿⱁⰵⰳⱁ ⱃⰰⰴⰻ. ⱂⱃⱑⱅⱃⱏⱂⱑⰲⱏⰹ ⰶⰵ ⰴⱁ ⰽⱁⱀⱐⱌⰰ ⱅⱏ ⱄⱂ҃ⱄⱀⱏ ⰱⱘⰴⰵⱅⱏ. ::
13:14
Ⰵⰳⰴⰰ ⰶⰵ ⰿⱃⱏⰸⱁⱄⱅⱐ ⱆⰸⱐⱃⰻⱅⰵ ⰸⰰⱂⱆⱄⱅⱑⱀⰻⱑ. ⱃⰵⱍⰵⱀⱘⱙ ⰴⰰⱀⰻⰻⰾⱁⰿⱏ !ⱂⱃⰽⰿⱏ. ⱄⱅⱁⱗⱎⱅⱘ ⰻⰴⰵⰶⰵ ⱀⰵ ⱂⱁⰴⱁⰱⰰⰰⱅⱏ. ⱍⱏⱅⱏⰹ ⰴⰰ ⱃⰰⰸⱆⰿⱑⰰⱅⱏ. ⱅⱏⰳⰴⰰ ⰻⰶⰵ ⰱⱘⰴⱘⱅⱏ ⰲⱏ ⰹⱓⰴⰵⰻ ⰴⰰ ⰱⱑⰳⰰⱙⱅⱏ ⱀⰰ ⰳⱁⱃⱏⰹ.
13:15
ⰺ ⰻⰶⰵ ⱀⰰ ⰽⱃⱁⰲⱑ ⰴⰰ ⱀⰵ ⱄⱏⰾⰰⰸⰻⱅⱏ ⰲⱏ ⰴⱁⰿⱏ. ⱀⰻ ⰴⰰ ⰲⱏⱀⰻⰴⰵⱅⱏ ⰲⱐⰸⱔⱅⱏ ⱍⰵⱄⱁ ⱁⱅⱏ ⰴⱁⰿⱆ ⱄⰲⱁⰵⰳⱁ.
13:16
ⰻ ⱄⱏⰹⰻ ⱀⰰ ⱄⰵⰾⱑ ⰴⰰ ⱀⰵ ⰲⱏⰸⰲⱃⰰⱅⰻⱅⱏ ⱄⱔ ⰲⱐⱄⱂⱔⱅⱐ ⰲⱐⰸⱔⱅⱏ ⱃⰻⰸⱏ ⱄⰲⱁⰻⱈⱏ ::
13:17
Ⰳⱁⱃⰵ ⰶⰵ ⱀⰵⱂⱃⰰⰸⰴⱏⱀⱏⰹⰿⱏ ⰻ ⰴⱁⱗⱎⱅⰹⰿⱏ ⰲⱏ ⱅⱏⰹ ⰴⱏⱀⰻ.
13:18
ⰿⱁⰾⰻⱅⰵ ⰶⰵ ⱄⱔ ⰴⰰ ⱀⰵ ⰱⱘⰴⰵ ⰱⱑⱄⱅⰲⱁ ⰲⰰⱎⰵ ⰸⰻⰿⱑ.
13:19
ⰱⱘⰴⱘⱅⱏ ⰱⱁ ⰴⱏⱀⰵ ⱅⰻ ⱄⰽⱃⱏⰱⱐⱀⰻ. ⱑⰽⱁ ⱀⰵ ⰱⱏⰹⱄⱅⱏ ⱅⰰⰽⱁⰲⰰ ⱁⱅⱏ ⱀⰰⱍⱔⰾⰰ ⰸⱏⰴⰰⱀⰻⱓ. ⰵⰶⰵ ⱄⱏⰸⱏⰴⰰ ⰱ҃ⱏ. ⰴⱁ ⱀⱏⰹⱀⱑ ⰻ ⱀⰵ ⰱⱘⰴⰵⱅⱏ.
13:20
ⰺ҅ ⰰⱎⱅⰵ ⱀⰵ ⰱⰻ ⰳ҃ⱏ ⱂⱃⱑⰽⱃⰰⱅⰻⰾⱏ ⰴⱐⱀⰻⰻ. ⱀⰵ ⰱⰻ ⰱⱏⰹⰾⰰ ⱄⱏⱂⰰⱄⰵⱀⰰ ⰲⱐⱄⱑⰽⰰ ⱂⰾⱏⱅⱐ. ⱀⱏ ⰺ҅ⰸⰱⱏⱃⰰⱀⱏⰹⱈⱏ ⱃⰰⰴⰻ ⱗⰶⰵ ⰻⰸⰱⱏⱃⰰ ⱂⱃⱑⰽⱃⰰⱅⰻⱅⱏ ⰴⱐⱀⰻ ::
13:21
ⰺ ⱅⱏⰳⰴⰰ ⰰⱎⱅⰵ ⱃⰵⱍⰵⱅⱏ ⰽⱏⱅⱁ ⰲⰰⰿⱏ ⱄⰵ ⱄⱐⰴⰵ !ⱈⱐ ⱄⰵ ⱁⰲⱏⰴⰵ. ⱀⰵ ⰻⰿⱑⱅⰵ ⰲⱑⱃⱏⰹ.
13:22
ⰲⱏⱄⱅⰰⱀⱘⱅⱏ ⰱⱁ ⰾⱏⰶⰻ ⱈⱃⱏⱄⱅⰻ. ⰻ ⰾⱏⰶⰻ ⱂⱃⱁⱃⱁⱌⰻ. ⰺ ⰴⰰⰴⱔⱅⱏ ⰸⱀⰰⰿⰵⱀⰻⱑ ⰻ ⱍⱓⰴⰵⱄⰰ. ⰴⰰ ⱂⱃⱑⰾⱐⱄⱅⱔⱅⱏ ⰰⱋⰵ ⰲⱏⰸⰿⱁⰶⱏⱀⱁ ⰻⰸⰱⱏⱃⰰⱀⱏⰹⱗ.
13:23
ⰲⱏⰹ ⰶⰵ ⰱⰾⱓⰴⱑⱅⰵ ⱄⱔ ⱄⰵ ⱂⱃⱑⰶⰴⰵ ⱃⱑⱈⱏ ⰲⰰⰿⱏ ⰲⱐⱄⱑ :: ::
13:24
Ⱀⱏ ⰲⱏ ⱅⱏⰹ ⰴⱐⱀⰻ ⱂⱁ ⱄⰽⱃⱏⰱⰻ ⱅⱁⰻ ⱄⰾⱏⱀⱐⱌⰵ ⱂⱁⰿⱃⰰⱍⰻⱅⱏ ⱄⱔ. ⰺ ⰾⱆⱀⰰ ⱀⰵ ⰴⰰⱄⱅⱏ ⱄⰲⱑⱅⰰ ⱄⰲⱁⰵⰳⱁ.
13:25
ⰺ ⰸⰲⱑⰸⰴⱏⰹ ⱀⰰⱍⱏⱀⱘⱅⱏ ⱂⰰⰴⰰⱅⰻ ⱄⱏ ⱀⰱ҃ⱄⰵ. ⰺ ⱄⰻⰾⱏⰹ ⱗⰶⰵ ⱄⱘⱅⱏ ⱀⰰ ⱀⰱ҃ⱄⱈⱏ ⱂⱁⰴⰲⰻⰶⱔⱅⱏ ⱄⱔ ::
13:26
ⰺ ⱅⱏⰳⰴⰰ ⱆⰸⱐⱃⱔⱅⱏ ⱄⱀ҃ⰰ !ⱍⰾⱁⰲⱍⱄⰽⰰⰰⰳⱁ. ⰳⱃⱔⰴⱘⱎⱅⰰ ⱀⰰ ⱁⰱⰾⰰⱌⱑⱈⱏ. ⱄⱏ ⱄⰻⰾⱁⱙ ⰿⱏⱀⱁⰳⱁⱙ ⰻ ⱄⰾⰰⰲⱁⱙ.
13:27
ⰺ ⱅⱏⰳⰴⰰ ⱂⱁⱄⱏⰾⰵⱅⱏ !ⰰⱀⱐⰼⰾⱏⰹ ⱄⰲⱁⱗ. ⰺ ⱄⱏⰱⰵⱃⰵⱅⱏ ⰻⰸⰱⱏⱃⰰⱀⱏⰹⱗ ⱄⰲⱁⱗ ⱁⱅⱏ ⱍⰵⱅⱏⰹⱃⱏ ⰲⱑⱅⱃⱏ. ⱁⱅⱏ ⰽⱁⱀⱐⱌⰰ ⰸⰵⰿⰾⱔ ⰴⱁ ⰽⱁⱀⱐⱌⰰ ⱀⰱ҃ⱄⰵ.
13:28
ⱁⱅⱏ ⱄⰿⱁⰽⱁⰲⱐⱀⰻⱌⱔ ⰶⰵ ⱀⰰⰲⱏⰹⰽⱀⱑⱅⰵ ⱂⱃⰻⱅⱏⱍⱘ. ⰵⰳⰴⰰ ⱓⰶⰵ ⰲⱑⱅⰲⱐⰵ ⰵⱗ ⰱⱘⰴⰵⱅⱏ ⰿⰾⰰⰴⱁ. ⰻ ⱂⱃⱁⰸⱔⰱⱀⰵⱅⱏ ⰾⰻⱄⱅⰲⱐⰵ. ⰲⱑⱄⱅⰵ ⱑⰽⱁ ⰱⰾⰻⰸⱏ ⰵⱄⱅⱏ ⰶⱔⱅⰲⰰ.
13:29
ⱅⰰⰽⱁ ⰻ ⰲⱏⰹ ⰵⰳⰴⰰ ⱆⰸⱐⱃⰻⱅⰵ ⱄⰻ ⰱⱏⰹⰲⰰⱙⱋⰰ. ⰲⱑⰴⰻⱅⰵ ⱑⰽⱁ ⰱⰾⰻⰸⱏ ⰵⱄⱅⱏ ⱂⱃⰻ ⰴⰲⱐⱃⰵⱈⱏ.
13:30
ⰰⰿⰻⱀ ⰳⰾⰰⰳⱁⰾⱙ ⰲⰰⰿⱏ ⱑⰽⱁ ⱀⰵ ⰻⰿⰰⱅⱏ ⱂⱃⱑⰻⱅⰻ ⱃⱁⰴⱁⱄⱐ ⰴⱁⱀⰴⰵⰶⰵ ⰲⱐⱄⱑ ⱄⰻ ⰱⱘⰴⱘⱅⱏ.
13:31
!ⱀⰱⱁ ⰻ ⰸⰵⰿⰾⱑ ⱂⱃⱑⰻⰴⰵⱅⱏ. ⰰ ⰿⱁⱑ ⱄⰾⱁⰲⰵⱄⰰ ⱀⰵ ⱂⱃⱑⰻⰴⱘⱅⱏ ::
13:32
Ⰰ ⱁ ⰴⱐⱀⰻ ⱅⱁⰿⱐ ⰻ ⱁ ⱍⰰⱄⱑ ⱀⰻⰽⱅⱁⰶⰵ ⱀⰵ ⰲⱑⱄⱅⱏ. ⱀⰻ ⰰⱀⰼ҃ⰾⰻ ⰻⰶⰵ ⱄⱘⱅⱏ ⱀⰰ ⱀⰱ҃ⱄⱈⱏ. ⱀⰻ ⱄⱀ҃ⱏ ⱅⱏⰽⱏⰿⱁ ⱁⱅⰵⱌⱏ.
13:33
ⰱⰾⱓⰴⱑⱅⰵ ⱄⱔ ⰻ ⰿⱁⰾⰻⱅⰵ ⱄⱔ. ⱀⰵ ⰲⱑⱄⱅⰵ ⰱⱁ ⰽⱁⰳⰴⰰ ⰲⱃⱑⰿⱔ ⰱⱘⰴⰵⱅⱏ.
13:34
ⱑⰽⱁⰶⰵ ⱍⰾⰲ҃ⰽⱏ ⱁⱈⱁⰴⱔ ⱁⱄⱅⰰⰲⰻ ⰴⱁⰿⱏ ⱄⰲⱁⰻ. ⰺ ⰴⰰⰲⱏ ⱃⰰⰱⱁⰿⱏ ⱄⰲⱁⰻⰿⱏ ⰲⰾⰰⱄⱅⱏ ⰻ ⰽⱁⰿⱆⰶⱏⰴⱁ ⰴⱑⰾⱁ ⱄⰲⱁⰵ. ⰺ ⰲⱃⰰⱅⱐⱀⰻⰽⱆ ⱂⱁⰲⰵⰾⱑ ⰴⰰ ⰱⱐⰴⰻⱅⱏ.
13:35
ⰱⱐⰴⰻⱅⰵ ⱆⰱⱁ ⱀⰵ ⰲⱑⱄⱅⰵ ⰱⱁ ⰽⱁⰳⰴⰰ !ⰳⱐ ⰴⱁⰿⱆ ⱂⱃⰻⰴⰵⱅⱏ. ⰲⰵⱍⰵⱃⱏ ⰾⰻ ⰲⱏ ⱂⱁⰾⱆ ⱀⱁⱎⱅⰻ. ⰾⰻ ⰲⱏ ⰽⱁⰽⱁⱅⱁⰳⰾⰰⱎⰵⱀⰻⰵ. ⰾⰻ ⱓⱅⱃⱁ.
13:36
ⰴⰰ ⱀⰵ ⱂⱃⰻⱎⰵⰴⱏ ⰲⱐⱀⰵⰸⰰⰰⱂⱘ ⱁⰱⱃⱔⱋⰵⱅⱏ ⰲⱏⰹ ⱄⱏⱂⱔⱎⱅⱔ.
13:37
ⰰ ⰵⰶⰵ ⰲⰰⰿⱏ ⰳⰾ҃ⰳⰾⱙ. ⰲⱐⱄⱑⰿⱏ ⰳⰾ҃ⱙ ⰱⱐⰴⰻⱅⰵ ::