ЕВАНГЕЛИЕ ЕЖЕ Ѿ МАРЪКА
12:1
ⰺ ⱀⰰⱍⱔⱅⱏ ⰻⰿⱏ ⱂⱃⰻⱅⱏⱍⰰⰿⰻ ⰳⰾ҃ⱅⰻ. ⰲⰻⱀⱁⰳⱃⰰⰴⱏ ⱍⰾ҃ⰽⱏ ⱀⰰⱄⰰⰴⰻ. ⰺ ⱁⰳⱃⰰⰴⰻ ⰻ ⱁⱂⰾⱁⱅⱁⰿⱐ. ⰺ ⰻⱄⰽⱁⱂⰰ ⱅⱁⱍⰻⰾⱁ ⰻ ⱄⱁⰸⱏⰴⰰ ⱄⱅⰾⱏⱂⱏ. ⰺ ⰲⱏⰴⰰⱄⱅⱏ ⰹ ⱅⱔⰶⰰⱅⰵⰾⰵⰿⱏ ⰻ ⱁⱅⰻⰴⰵ.
12:2
ⰺ ⱂⱁⱄⱏⰾⰰ ⰽⱏ ⱅⱔⰶⰰⱅⰵⰾⰵⰿⱏ ⱃⰰⰱⱏ ⰲⱏ ⰲⱃⱑⰿⱔ .ⰴⰰ ⱁⱅⱏ ⱅⱔⰶⰰⱅⰵⰾⱏ ⱂⱃⰻⰻⰿⰵⱅⱏ. ⱁⱅⱏ ⱂⰾⱁⰴⱏ ⰲⰻⱀⱁⰳⱃⰰⰴⰰ.
12:3
ⱁⱀⰻ ⰶⰵ ⰵⰿⱏⱎⰵ ⰻ ⰱⰻⱎⱔ ⰻ ⱂⱁⱄⱏⰾⰰⱎⱔ ⱅⱐⱎⱅⱐ.
12:4
ⰺ ⱂⰰⰽⱏⰹ ⱂⱁⱄⱏⰾⰰ ⰽⱏ ⱀⰻⰿⱏ ⰴⱃⱆⰳⱏⰹⰻ ⱃⰰⰱⱏ. ⰺ ⱅⱁⰳⱁ ⰽⰰⰿⰵⱀⰻⰵⰿⱐ ⰱⰻⰲⱏⱎⰵ ⱂⱃⱁⰱⰻⱎⱔ ⰳⰾⰰⰲⱘ ⰵⰿⱆ. ⰺ҅ ⱂⱁⱄⱏⰾⰰⱎⱔ ⰱⰵⱋⱐⱄⱅⱏⱀⰰ.
12:5
ⰺ ⱂⰰⰽⱏⰹ ⰻⱀⱁⰳⱁ ⱂⱁⱄⱏⰾⰰ ⰻ ⱅⱁⰳⱁ ⱆⰱⰻⱎⱔ ⰻⱀⱏⰹ ⰿⱏⱀⱁⰳⱏⰹ. ⱁⰲⱏⰹ ⰱⰻⱙⱎⱅⰵ ⱁⰲⱏⰹ ⱆⰱⰻⱑⱙⱎⱅⰵ.
12:6
ⰵⱎⱅⰵ ⰶⰵ ⰻⰿⱑⰰⱎⰵ ⰵⰴⰻⱀⱁⰳⱁ ⱄⱀ҃ⰰ. ⰲⱐⰸⰾⱓⰱⰾⰵⱀⰰⰰⰳⱁ ⱄⰲⱁⰵⰳⱁ. ⱂⱁⱄⱏⰾⰰ ⰻ ⱅⱁⰳⱁ ⰽⱏ ⱀⰻⰿⱏ ⱂⱁⱄⰾⱑⰴⱐ ⰳⰾ҃ⱔ. ⱑⰽⱁ ⱂⱁⱄⱃⰰⰿⰾⱑⱙⱅⱏ ⱄⱔ ⱄⱀ҃ⰰ ⰿⱁⰵⰳⱁ. ::
12:7
ⱁⱀⰻ ⰶⰵ ⱅⱔⰶⰰⱅⰵⰾⰵ ⰽⱏ ⱄⰵⰱⱑ ⱃⱑⱎⱔ. ⱑⰽⱁ ⱄⱐ ⰵⱄⱅⱏ ⱀⰰⱄⰾⱑⰴⱏⱀⰻⰽⱏ. ⱂⱃⰻⰴⱑⱅⰵ ⱆⰱⰻⱑⰿⱏ ⰹ. ⰺ ⱀⰰⱎⰵ ⰱⱘⰴⰵⱅⱏ ⰴⱁⱄⱅⱁⱑⱀⰻⰵ.
12:8
ⰺ ⰵⰿⱏⱎⰵ ⱆⰱⰻⱎⱔ ⰻ. ⰺ ⰻⰸⰲⱃⱏⰳⱘ ⰻ ⰲⱁⱀⱏ ⰻⰸ ⰲⰻⱀⱁⰳⱃⰰⰴⰰ.
12:9
ⱍⱏⱅⱁ ⱆⰱⱁ ⱄⱏⱅⰲⱁⱃⰻⱅⱏ !ⰳⱐ ⰲⰻⱀⱁⰳⱃⰰⰴⰰ ⱂⱃⰻⰴⰵⱅⱏ ⰻ ⱂⱁⰳⱆⰱⰻⱅⱏ ⱅⱔⰶⰰⱅⰵⰾⱔ. ⰺ ⰴⰰⱄⱅⱏ ⰲⰻⱀⱁⰳⱃⰰⰴⱏ ⰻⱀⱑⰿⱏ.
12:10
ⱀⰻ ⰾⰻ ⱄⰻⱈⱏ ⰵⱄⱅⰵ ⰽⱏⱀⰻⰳⱏ ⱍⱐⰾⰻ. ⰽⰰⰿⰵⱀⱐ ⰵⰳⱁⰶⰵ ⱀⰵⰲⱃⱑⰴⱆ ⱄⱏⱅⰲⱁⱃⰻⱎⱔ ⰸⰻⰶⰴⱘⱎⱅⰵⰻ. ⱄⱏ ⰱⱏⰹⱄⱅⱏ ⰲⱏ ⰳⰾⰰⰲⱘ ⱘⰳⱏⰾⱆ.
12:11
ⱁⱅⱏ ⰳ҃ⰰ ⰱⱏⰹⱄⱅⱏ ⱄⰻ. ⰺ ⰵⱄⱅⱏ ⰴⰻⰲⱏⱀⰰ ⰲⱏ ⱁⱍⰻⱙ ⱀⰰⱎⰵⱓ.
12:12
ⰺ҅ ⰻⱄⰽⰰⰰⱈⱘ ⱗⱅⰻ ⰻ ⰻ ⱆⰱⱁⱑⱎⱔ ⱄⱔ ⱀⰰⱃⱁⰴⰰ. ⱃⰰⰸⱆⰿⱑⱎⱔ ⰱⱁ ⱑⰽⱁ ⰽⱏ ⱀⰻⰿⱏ ⱃⰵⱍⰵ ⱂⱃⰻⱅⱏⱍⱘ. ⰺ ⱁⱄⱅⰰⰲⱐⱎⰵ ⰻ ⱁⱅⰻⰴⱘ.
12:13
ⰺ ⱂⱁⱄⱏⰾⰰⱎⱔ ⰽⱏ ⱀⰵⰿⱆ ⰵⰴⰻⱀⱏⰹ ⱁⱅⱏ ⱇⰰⱃⰻⱄⱑⰻ. ⰺ ⰻⱃⱁⰴⰻⱑⱀⱏⰹ ⰴⰰ ⰻ ⰱⱘ ⱁⰱⰾⱐⱄⱅⰻⰾⰻ ⱄⰾⱁⰲⱁⰿⱐ.
12:14
ⱁⱀⰻ ⰶⰵ ⱂⱃⰻⱎⰵⰴⱏⱎⰵ ⰳⰾ҃ⰰⱎⱔ ⰵⰿⱆ ⱆⱍⰻⱅⰵⰾⱓ. ⰲⱑⰿⱐ ⱑⰽⱁ ⰻⱄⱅⰻⱀⰵⱀⱏ ⰵⱄⰻ ⰺ ⱀⰵ ⱃⱁⰴⰻⱎⰻ ⱀⰻ ⱁ ⰽⱁⰿⱐⰶⰵ. ⱀⰵ ⰸⱐⱃⰻⱎⰻ ⰱⱁ ⱀⰰ ⰾⰻⱌⰵ ⱍⰾⰲ҃ⰽⱁⰿⱏ. ⱀⱏ ⰲⱏⰹ ⰻⱄⱅⰻⱀⱘ ⱂⱘⱅⰻ ⰱⰶ҃ⰻⱓ ⱆⱍⰻⱎⰻ. ⰴⱁⱄⱅⱁⰻⱅⱏ ⰾⰻ ⰴⰰⱅⰻ ⰽⰻⱀⱐⱄⱏ ⰽⰵⱄⰰⱃⰵⰲⰻ ⰻⰾⰻ ⱀⰻ. ⰴⰰⰿⱐ ⰾⰻ ⰻⰾⰻ ⱀⰵ ⰴⰰⰿⱐ.
12:15
ⱁⱀⱏ ⰶⰵ ⰲⱑⰴⱏⰹ ⰻⱈⱏ ⰾⰻⱌⰵⰿⱑⱃⰻⰵ ⱃⰵⱍⰵ ⰻⰿⱏ. ⱍⱏⱅⱁ ⰿⱔ ⱁⰽⱆⱎⰰⰰⱅⰵ. ⱂⱃⰻⱀⰵⱄⱑⱅⰵ ⰿⰻ ⱂⱑⱀⱔⰸⱏ ⰴⰰ ⰲⰻⰶⰴⱘ.
12:16
ⱁⱀⰻ ⰶⰵ ⱂⱃⰻⱀⱑⱄⱔ ⰻ ⰳⰾ҃ⰰ ⰻⰿⱏ. ⱍⰻⰻ ⰵⱄⱅⱏ ⱁⰱⱃⰰⰸⱏ ⱄⱐ ⰻ ⱀⰰⱂⰻⱄⰰⱀⰻⰵ. ⱁⱀⰻ ⰶⰵ ⱃⱑⱎⱔ ⰵⰿⱆ ⰽⰵⱄⰰⱃⱁⰲⱏ.
12:17
ⰺ ⱁⱅⱏⰲⱑⱋⰰⰲⱏ ⰻⱄ҃ⱏ ⱃⰵⱍⰵ ⰻⰿⱏ. ⰽⰵⱄⰰⱃⱁⰲⰰ ⰲⱏⰸⰴⰰⰴⰻⱅⰵ ⰽⰵⱄⰰⱃⱁⰲⰻ. ⰺ ⰱⰶ҃ⰻⱑ !ⰱⰲⰻ ⰻ ⱍⱓⰴⰻⱎⱔ ⱄⱔ ⱁ ⱀⰵⰿⱐ.
12:18
ⰺ ⱂⱃⰻⰴⱙ ⱄⰰⰴⱆⰽⰵⰻ ⰽⱏ ⱀⰵⰿⱆ ⰻⰶⰵ ⰳⰾ҃ⰳⰾⱙⱅⱏ ⱀⰵ ⰱⱏⰹⱅⰻ ⰲⱐⱄⰽⱃⱑⱎⰵⱀⰻⱓ ⰻ ⰲⱏⱂⱃⱁⱄⰻⱎⱔ ⰻ ⰳⰾ҃ⱙⱎⱅⰵ.
12:19
ⱆⱍⰻⱅⰵⰾⱓ. ⰿⱁⱄⰻⰻ ⱀⰰⱂⰻⱄⰰ ⱀⰰⰿⱏ. ⱑⰽⱁ ⰰⱋⰵ ⰽⱁⰿⱆ ⰱⱃⰰⱅⱃⱏ ⱆⰿⱐⱃⰵⱅⱏ. ⰺ ⱁⱄⱅⰰⰲⰻⱅⱏ ⰶⰵⱀⱘ. ⰰ ⱍⱔⰴⱏ ⱀⰵ ⱁⱄⱅⰰⰲⰻⱅⱏ. ⰴⰰ ⱂⱁⰻⰿⰵⱅⱏ ⰱⱃⰰⱅⱃⱏ ⰶⰵⱀⱘ ⰵⰳⱁ. ⰺ ⰲⱐⱄⰽⱃⱑⱄⰻⱅⱏ ⱄⱑⰿⱔ ⰱⱃⰰⱅⱃⰰ ⱄⰲⱁⰵⰳⱁ.
12:20
ⰱⱑ ⰶⰵ ⱄⰵⰴⰿⱐ ⰱⱃⰰⱅⱃⰻⱗ. ⰺ ⱂⱃⱏⰲⱏⰹ ⱂⱁⱗ ⰶⰵⱀⱘ ⰻ ⱆⰿⰻⱃⰰⱗ ⱀⰵ ⱁⱄⱅⰰⰲⰻ ⱄⱑⰿⰵⱀⰵ.
12:21
ⰺ ⰲⱏⱅⱁⱃⱏⰹ ⱂⱁⱗ ⱙ ⰻ ⱆⰿⱐⱃⱑⱅⱏ ⰺ ⱅⱏ ⱀⰵ ⱁⱄⱅⰰⰲⰻ ⱄⱑⰿⰵⱀⰵ. ⰺ ⱅⱃⰵⱅⰻⰻ ⱅⰰⰽⱁⰶⰴⰵ.
12:22
ⰺ ⱂⱁⱗⱄⱔ ⱙ ⱄⰵⰴⰿⱐ ⰻ ⱀⰵ ⱁⱄⱅⰰⰲⰻⱎⱔ ⱄⱑⰿⰵⱀⰵ. ⱂⱁⱄⰾⱑⰴⱐ ⰶⰵ ⰲⱐⱄⱑⱈⱏ ⱆⰿⱐⱃⱑⱅⱏ ⰻ ⰶⰵⱀⰰ.
12:23
ⰲⱏ ⰲⱏⱄⰽⱃⱑⱎⰵⱀⰻⰵ ⱆⰱⱁ ⰵⰳⰴⰰ ⰲⱁⱄⰽⱃⱏⱄⱀⱘⱅⱏ. ⰽⱁⱅⱁⱃⱆⰿⱆ ⰻⱈⱏ ⰱⱘⰴⰵⱅⱏ. ⰶⰵⱀⰰ. ⱄⰵⰴⰿⱐ ⰱⱁ ⰻⱈⱏ ⰻⰿⱑⱎⱔ ⱙ ⰶⰵⱀⱘ.
12:24
ⰺ ⱁⱅⱏⰲⱑⱎⱅⰰⰲⱏ ⰻⱄ҃ⱏ ⱃⰵⱍⰵ ⰻⰿⱏ. ⱀⰵ ⱄⰵⰳⱁ ⰾⰻ ⱃⰰⰴⰻ ⰱⰾⱘⰴⰻⱅⰵ ⱀⰵ ⰲⱑⰴⱘⱎⱅⰵ ⰽⱏⱀⰻⰳⱏ. ⱀⰻ ⱄⰻⰾⱏⰹ ⰱⰶ҃ⰻⱗ.
12:25
Ⰵⰳⰴⰰ ⰱⱁ ⰻⰸ ⰿⱃⱏⱅⰲⱏⰹⱈⱏ ⰲⱏⱄⰽⱃⱏⱄⱀⱘⱅⱏ. ⱀⰻ ⰶⰵⱀⱔⱅⱏ ⱄⱔ ⱀⰻ ⱂⱁⱄⰰⰳⰰⱙⱅⱏ. ⱀⱏ ⱄⱘⱅⱏ ⱑⰽⱁ ⰰⱀⰼ҃ⰻ ⱀⰰ ⱀⰵⰱⰵⱄⰵⱈⱏ.
12:26
ⰰ ⱁ ⰿⱃⱏⱅⰲⱏⰹⰻⱈⱏ ⱑⰽⱁ ⰲⱏⱄⱅⰰⱀⱘⱅⱏ. ⱀⱑⱄⱅⰵ ⰾⰻ ⱍⱏⰾⰻ ⰲⱏ ⰽⱏⱀⰻⰳⰰⱈⱏ ⰿⱁⱄⰵⱁⰲⰰⱈⱏ. ⱂⱃⰻ ⰽⱘⱂⰻⱀⱑ ⰽⰰⰽⱁ ⱃⰵⱍⰵ ⰵⰿⱆ ⰱ҃ⱏ ⰳⰾ҃ⱔ. ⰰⰸⱏ ⰱ҃ⱏ ⰰⰲⱃⰰⰿⰾⱐ ⰻ ⰱ҃ⱏ ⰻⱄⰰⰽⱁⰲⱏ. ⰻ ⰱ҃ⱏ ⰻⱑⰽⱁⰲⰾⱐ.
12:27
ⱀⱑⱄⱅⱏ ⰱⱁⰳⱏ ⰿⱃⱏⱅⰲⱏⰹⱈⱏ. ⱀⱏ ⰱ҃ⱏ ⰶⰻⰲⱏⰹⱈⱏ. ⰲⱏⰹ ⱆⰱⱁ ⰿⱏⱀⱁ[ⰳⱁ] ⰱⰾⱘⰴⰻⱅⰵ.
12:28
ⰺ ⱂⱃⰻⱄⱅⱘⱂⱐ ⰵⰴⰻⱀⱏ ⱁⱅⱏ ⰽⱏⱀⰻⰶⱐⱀⰻⰽⱏ. ⱄⰾⱏⰹⱎⰰⰲⱏ ⱗ ⱄⱏⱅⱔⰷⰰⱙⱎⱅⱔ ⱄⱔ. ⰲⰻⰴⱑⰲⱏ ⱑⰽⱁ ⰴⱁⰱⱃⱑ ⱁⱅⱏⰲⱑⱎⱅⰰ ⰻⰿⱏ. ⰲⱏⱂⱃⱁⱄⰻ ⰻ ⰽⰰⱑ ⰵⱄⱅⱏ ⰸⰰⱂⱁⰲⱑⰴⱏ ⱂⱃⱏⰲⰰ ⰲⱐⱄⱑⱈⱏ.
12:29
ⰺⱄ҃ ⰶⰵ ⰳⰾ҃ⰰ ⰵⰿⱆ. Ⱑⰽⱁ ⱂⱃⱏⰲⱑⰻⱎⰻ ⰸⰰⱂⱁⰲⱑⰴⱐ ⰵⱄⱅⱏ ⰲⱐⱄⱑⱈⱏ. ⱄⰾⱏⰹⱎⰻ ⰻⰸ҃ⰾⱓ ⰳ҃ⱏ ⰱ҃ⱏ ⱀⰰⱎⱏ. ⰳ҃ⱏ ⰵⰴⰻⱀⱏ ⰵⱄⱅⱏ.
12:30
ⰺ ⰲⱐⰸⰾⱓⰱⰻⱎⰻ ⰳ҃ⰰ ⰱ҃ⰰ ⱅⰲⱁⰵⰳⱁ. ⰲⱐⱄⱑⰿⱏ ⱄⱃⰴ҃ⱌⰵⰿⱏ ⱅⰲⱁⰻⰿⱏ. ⰺ ⰲⱐⱄⰵⱙ ⰴⱎ҃ⰵⱙ ⱄⰲⱁⰵⱙ. ⰺ ⰲⱐⱄⰵⱙ ⰿⱏⰹⱄⰾⰻⱙ ⱄⰲⱁⰵⱙ. ⰺ ⰲⱐⱄⰵⱙ ⰽⱃⱑⱂⱁⱄⱅⰻⱙ ⱄⰲⱁⰵⱙ. ⱄⰻ ⱂⱃⱏⰲⰰ ⰲⱐⱄⱑⱈⱏ ⰸⰰⱂⱁⰲⱑⰴⱐ.
12:31
ⰺ ⰲⱏⱅⱁⱃⰰⱑ ⱂⱁⰴⱁⰱⱏⱀⰰ ⰵⰻ. ⰲⱐⰸⰾⱓⰱⰻⱎⰻ ⰻⱄⰽⱃⱐⱀⱑⰳⱁ ⱄⰲⱁⰵⰳⱁ ⱑⰽⱁ ⱄⰰⰿⱏ ⱄⰵⰱⰵ. ⰱⱁⰾⱐⱎⱔ ⱄⰵⱓ ⰻⱀⱁⱗ ⰸⰰⱂⱁⰲⱑⰴⰻ ⱀⱑⱄⱅⱐ.
12:32
ⰺ҅ ⱃⰵⱍⰵ ⰵⰿⱆ ⰽⱏⱀⰻⰶⱏⱀⰻⰽⱏ ⰴⱁⰱⱃⱑ ⱆⱍⰻⱅⰵⰾⱓ ⰲⱏ ⰹⱄⱅⰻⱀⱘ ⱃⰵⱍⰵ. ⱑⰽⱁ ⰵⰴⰻⱀⱏ ⰵⱄⱅⱏ. ⰺ ⱀⱑⱄⱅⱏ ⰻⱀⱁⰳⱁ ⱃⰰⰸⰲⱑ ⰵⰳⱁ.
12:33
ⰺ ⰵⰶⰵ ⰾⱓⰱⰻⱅⰻ ⰻ ⰲⱐⱄⱑⰿⱏ ⱄⱃⰴ҃ⱌⰵⰿⱐ. ⰺ ⰲⱐⱄⱑⰿⱐ ⱃⰰⰸⱆⰿⱁⰿⱏ. ⰺ ⰲⱐⱄⰵⱙ ⰴⱎ҃ ⱙ҅. ⰺ ⰲⱐⱄⰵⱙ ⰽⱃⱑⱂⱁⱄⱅⰻⱙ. ⰺ ⰻⰶⰵ ⰾⱓⰱⰻⱅⱏ ⰻⱄⰽⱃⱐⱀⱑⰰⰳⱁ ⱑⰽⱁ ⱄⰵⰱⰵ. ⰱⱁⰾⰵ ⰵⱄⱅⱏ ⰲⱐⱄⱑⱈⱏ ⱁⰾⱁⰽⰰⰲⱅⱁⰿⰰⱅⱏ ⰻ ⰶⱃⱏⱅⰲⱏ.
12:34
ⰺⱄ҃ ⰶⰵ ⰲⰻⰴⱑⰲⱏⰹ ⰻ. ⱑⰽⱁ ⱄⱏⰿⱏⰹⱄⰾⱏⱀⱁ ⱁⱅⱏⰲⱑⱎⱅⰰ ⱃⰵⱍⰵ ⰵⰿⱆ. ⱀⰵ ⰴⰰⰾⰵⱍⰵ ⰵⱄⰻ ⱁⱅⱏ ⱌⱄ҃ⱃⱄⱅⰲⰻⱑ ⰱⰶ҃ⰻⱑ. ⰺ ⱀⰻⰽⱏⱅⱁⰶⰵ ⱀⰵ ⱄⱏⰿⱑⰰⱎⰵ ⰵⰳⱁ ⰽⱏ ⱅⱁⰿⱆ ⰲⱏⱂⱃⱁⱄⰻⱅⰻ.
12:35
ⰺ ⱁⱅⱏⰲⱑⱎⱅⰰⰲⱏ ⰻⱄ҃ⱏ ⰳⰾ҃ⰰⱎⰵ ⱆⱍⱔ ⰲⱏ !ⱌⱃⰽⰲⰵ. Ⰽⰰⰽⱁ ⰳⰾ҃ⱙⱅⱏ ⰽⱏⱀⰻⰶⱐⱀⰻⱌⰻ ⱑⰽⱁ !ⱈⱏ ⱄⱀ҃ⱏ !ⰴⰰⰲⱏ ⰵⱄⱅⱏ.
12:36
ⱅⱏ ⰱⱁ ⱃⰵⱍⰵ ⰴⰰⰲ҃ⰴⱏ ⰴⱈ҃ⰿⱐ ⱄⰲ҃ⱅⱏⰿⱏ. ⱃⰵⱍⰵ ⰳ҃ⱏ !ⰳⰲⰻ ⰿⱁⰵⰿⱆ ⱄⱑⰴⰻ ⱁ ⰴⰵⱄⱀⱘⱙ ⰿⰵⱀⰵ. ⰴⱁⱀⰴⰵⰶⰵ ⱂⱁⰾⱁⰶⱘ ⰲⱃⰰⰳⱏⰹ ⱅⰲⱁⱗ ⱂⱁⰴⱏⱀⱁⰶⰻⰵ ⱀⱁⰳⰰⰿⰰ ⱅⰲⱁⰻⰿⰰ.
12:37
ⱄⰰⰿⱏ ⱆⰱⱁ !ⰴⰲⰴⱏ ⱀⰰⱃⰻⱌⰰⰰⱅⱏ ⰹ ⰳ҃ⰰ. ⰺ ⰽⰰⰽⱁ ⰵⰿⱆ ⰵⱄⱅⱏ ⱄⱀ҃ⱏ. ⰺ҅ ⰿⱏⱀⱁⰷⰻ ⱀⰰⱃⱁⰴⰻ ⱂⱁⱄⰾⱆⱎⰰⰰⱈⱘ ⰵⰳⱁ ⰲⱏ ⱄⰾⰰⱄⱅⱐ ::
12:38
ⰺ ⰳⰾ҃ⰰⱎⰵ ⰻⰿⱏ ⰲⱏ ⱆⱍⰵⱀⰻⰻ ⱄⰲⱁⰵⰿⱏ. ⰱⰾⱓⰴⱑⱅⰵ ⱄⱔ ⱁⱅⱏ ⰽⱏⱀⰻⰶⱐⱀⰻⰽⱏ. ⱈⱁⱅⱔⱎⱅⰻⰻⱈⱏ ⰲⱏ ⱁⰴⱑⰰⱀⰻⰻⱈⱏ ⱈⱁⰴⰻⱅⰻ. ⰺ ⱌⱑⰾⱁⰲⰰⱀⰻⱑ ⱀⰰ ⱅⱃⱏⰶⰻⱎⱅⰻⱈⱏ.
12:39
ⰺ ⱂⱃⱑⰶⰴⰵⱄⱑⰴⰰⱀⰻⱑ ⱀⰰ ⱄⱁⱀⱐⰿⰻⱎⱅⰻⱈⱏ. ⰺ ⱂⱃⱐⰲⱁⰲⱐⰸⰾⰵ[ⰶⰵ]ⱀⰻⱑ ⱀⰰ ⰲⰵⱍⰵⱃⱑⱈⱏ.
12:40
ⱂⱁⱑⰴⰰⱙⱎⱅⰻⱈⱏ ⰴⱁⰿⱏⰹ ⰲⱏⰴⱁⰲⰹⱌⱏ. ⰺ ⱀⰵⱂⱏⱋⰵⰲⰰⱀⰻⰵⰿⱏ ⰴⰰⰾⰵⱍⰵ ⰿⱁⰾⱔⱎⱅⰵ ⱄⱔ. ⱄⰻⰻ ⱂⱃⰻⰻⰿⱘⱅⱏ ⰾⰻⱎⰵ ⱁⱄⱘⰶⰴⰵⱀⰻⰵ.
12:41
ⰺ҅ ⱄⱑⰴⱏ ⰻⱄ҃ⱏ ⱂⱃⱑⰿⱁ ⰳⰰⰸⱁⱇⰻⰾⰰⰽⰵⱁⰲⰻ. ⰲⰻⰴⱑⰰⱎⰵ ⰽⰰⰽⱁ ⱀⰰⱃⱁⰴⱏ ⰿⰵⱅⰵⱅⱏ ⰿⱑⰴⱐ ⰲⱐ ⰳⰰⰸⱁⱇⰻⰾⰰⰽⰻⱙ. ⰺ ⰿⱀⱁⰷⰻ ⰱⱁⰳⰰⱅⰻⰻ ⰲⱏⰿⱑⱅⰰⰰⱈⱘ ⰿⱀⱁⰳⰰ.
12:42
ⰺ ⱂⱃⰻⱎⰵⰴⱏⱎⰻ ⰵⰴⰻⱀⰰ ⰲⱏⰴⱁⰲⰻⱌⰰ ⱆⰱⱁⰳⰰ. ⰲⱏⰲⱃⱏⰶⰵ ⰴⱏⰲⱑ ⰾⰵⱂⱅⱑ. ⰵⰶⰵ ⰵⱄⱅⱏ ⰽⱁⰴⱃⰰⱀⱅⱏ.
12:43
ⰺ ⱂⱃⰻⰸⱏⰲⰰⰲⱏ ⱆⱍⰵⱀⰻⰽⱏⰹ ⱄⰲⱁⱗ ⱃⰵⱍⰵ ⰻⰿⱏ. ⰰⰿⰻⱀⱐ ⰳⰾ҃ⱙ ⰲⰰⰿⱏ ⱑⰽⱁ ⰲⱏⰴⱁⰲⰻⱌⰰ ⱄⰻ ⱆⰱⱁⰳⰰⰰ. ⰿⱏⱀⱁⰶⱑⰵ ⰲⱐⱄⱑⱈⱏ ⰲⱏⰲⱃⱏⰶⰵ. ⰲⱏⰿⱑⱅⰰⱙⱎⱅⰻⰻⱈⱏ ⰲⱏ ⰳⰰⰸⱁⱇⰻⰾⰰⰽⰻⱙ.
12:44
ⰲⱐⱄⰻ ⰱⱁ ⱁⱅⱏ ⰻⰸⰱⱏⰹⱅⱏⰽⰰ ⱄⰲⱁⰵⰳⱁ ⰲⱏⰲⱃⱏⰳⱘ. ⰰ ⱄⰻ ⱁⱅⱏ ⰾⰻⱎⰵⱀⰻⱑ ⱄⰲⱁⰵⰳⱁ ⰲⱐⱄⰵ ⰵⰾⰻⰽⱁ ⰻⰿⱑⰰⱎⰵ ⰲⱏⰲⱃⱏⰶⰵ. ⰲⱐⱄⰵ ⰶⰻⱅⰻⰵ ⱄⰲⱁⰵ ::