ЕВАНГЕЛИЕ ЕЖЕ Ѿ МАРЪКА
10:1
ⰺ ⱁⱅⱏ ⱅⱘⰴⱆ ⰲⱏⱄⱅⰰⰲⱏ ⱂⱃⰻⰴⰵ ⰲⱏ ⱂⱃⱑⰴⱑⰾⱏⰹ ⰻⱓⰴⰵⰻⱄⰽⱏⰹ. ⱂⱁ ⱁⱀⱁⰿⱆ ⱂⱁⰾⱆ ⰻⱁⱃⱏⰴⰰⱀⰰ. ⰻ ⱂⱃⰻⰴⱘ ⱂⰰⰽⱏⰹ ⱀⰰⱃⱁⰴⰻ ⰽⱏ ⱀⰵⰿⱆ. ⰺ ⱑⰽⱁ ⰻⰿⱑ ⱁⰱⱏⰹⱍⰰⰻ ⱂⰰⰽⱏⰹ ⱆⱍⰰⰰⱎⰵ ⱗ ::
10:2
Ⰺ ⱂⱃⰻⱄⱅⱘⱂⱐⱎⰵ ⱇⰰⱃⰻⱄⱑⰻ ⰲⱏⱂⱃⰰⱎⰰⰰⱈⱘ ⰻ. ⰰⱋⰵ ⰴⱁⱄⱅⱁⰻⱅⱏ ⰿⱘⰶⱓ ⰶⰵⱀⱘ ⱂⱆⱎⱅⰰⱅⰻ. ⱁⰽⱆⱎⰰⱙⱎⱅⰵ ⰻ.
10:3
ⱁⱀⱏ ⰶⰵ ⱁⱅⱏⰲⱑⱎⱅⰰⰲⱏ ⱃⰵⱍⰵ ⰻⰿⱏ. ⱍⱅⱁ ⰲⰰⰿⱏ ⰸⰰⱂⱁⰲⱑⰴⱑ ⰿⱁⱄⰻ.
10:4
ⱂⱁⰲⰵⰾⱑ ⰿⱁⱄⰻ ⰽⱏⱀⰻⰳⱏⰹ ⱃⰰⱄⱂⱆⱄⱅⱏⱀⱏⰹⱗ ⱀⰰⱂⰻⱄⰰⱅⰻ ⰻ ⱂⱆⱄⱅⰻⱅⰻ.
10:5
ⰺ ⱁⱅⱏⰲⱑⱋⰰⰲⱏ ⰻⱄ҃ⱏ ⱃⰵⱍⰵ ⰻⰿⱐ. ⱂⱁ ⰶⰵⱄⱅⱁⱄⱃⱏⰴⰻⱓ ⰲⰰⱎⰵⰿⱆ ⱀⰰⱂⰻⱄⰰ ⰲⰰⰿⱏ ⰸⰰⱂⱁⰲⱑⰴⱐ ⱄⰻⱙ.
10:6
ⰰ҅ ⱁⱅⱏ ⱀⰰⱍⱔⰾⰰ ⱄⱏⰸⱏⰴⰰⱀⰻⱓ. ⰿⱘⰶⰰ ⰻ ⰶⰵⱀⱘ ⱄⱏⱅⰲⱁⱃⰻⰾⱏ ⱑ ⰵⱄⱅⱏ ⰱ҃ⱏ.
10:7
ⱄⰵⰳⱁ ⱃⰰⰴⰻ ⱁⱄⱅⰰⰲⰻⱅⱏ ⱍⰾ҃ⰽⱏ ⱁⱅ҃ⱌⰰ ⱄⰲⱁⰵⰳⱁ ⰻ ⰿⰰⱅⰵⱃⱐ. ⰺ ⱂⱃⰻⰾⱑⱂⰻⱅⱏ ⱄⱔ ⰽⱏ ⰶⰵⱀⱑ ⱄⰲⱁⰵⰻ.
10:8
ⰺ ⰱⱘⰴⰵⱅⰵ ⱁⰱⰰ ⰲⱏ ⱂⰾⱏⱅⱐ ⰵⰴⰻⱀⱘ. ⱅⱑⰿⱐ ⰶⰵ ⱓⰶⰵ ⱀⱑⱄⱅⰵ ⰴⱏⰲⰰ ⱀⱏ ⱂⰾⱏⱅⱐ ⰵⰴⰻⱀⰰ.
10:9
ⰵⰶⰵ ⱆⰱⱁ ⰱ҃ⱏ ⱄⱏⱍⰵⱅⰰⰾⱏ ⰵⱄⱅⱏ. !ⱍⰽⱏ ⰴⰰ ⱀⰵ ⱃⰰⰸⰾⱘⱍⰰⰰⱅⱏ ::
10:10
ⰺ ⰲⱏ ⰴⱁⰿⱆ ⱂⰰⰽⱏⰹ ⱆⱍⰵⱀⰻⱌⰻ ⰵⰳⱁ ⱁ ⱄⰵⰿⱏ ⰲⱏⱂⱃⰰⱎⰰⰰⱈⱘ ⰻ.
10:11
ⰺ ⰳⰾ҃ⰰ ⰻⰿⱏ. ⰻⰶⰵ ⰰⱎⱅⰵ ⱂⱆⱄⱅⰻⱅⱏ ⰶⰵⱀⱘ ⱄⰲⱁⱙ. ⰺ ⱁⰶⰵⱀⰻⱅⱏ ⱄⱔ ⰻⱀⱁⱙ ⱂⱃⱑⰾⱓⰱⱏⰹ ⱅⰲⱁⱃⰻⱅⱏ ⱀⰰ ⱀⱙ.
10:12
ⰺ ⰰⱎⱅⰵ ⰶⰵⱀⰰ ⱂⱆⱎⱅⱏⱎⰻ ⰿⱘⰶⰰ ⱂⱁⱄⰰⰳⱀⰵⱅⱏ ⰸⰰ ⰻⱀⱏ ⱂⱃⱑⰾⱓⰱⱏⰹ ⱅⰲⱁⱃⰻⱅⱏ.
10:13
ⰺ ⱂⱃⰻⱀⱁⱎⰰⰰⱈⱘ ⰽⱏ ⱀⰵⰿⱆ ⰴⱑⱅⰻ. ⰴⰰ ⱗ ⰽⱁⱄⱀⰵⱅⱏ. ⱆⱍⰵⱀⰻⱌⰻ ⰶⰵ ⱂⱃⱑⱎⱅⰰⰰⱈⱘ ⱂⱃⰻⱀⱁⱄⱔⱋⰻⰻⰿⱏ.
10:14
ⰲⰻⰴⱑⰲⱏ ⰶⰵ ⰻⱄ҃ⱏ ⱀⰵⰳⱁⰴⱁⰲⰰ. ⰺ ⰳⰾ҃ⰰ ⰻⰿⱏ. ⱀⰵ ⰴⱑⰻⱅⰵ ⰴⱑⱅⰻⰻ ⱂⱃⰻⱈⱁⰴⰻⱅⰻ ⰽⱏ ⰿⱐⱀⱑ. ⰺ ⱀⰵ ⰱⱃⰰⱀⰻⱅⰵ ⰻⰿⱏ. ⱅⰰⱌⱑⱈⱏ ⰱⱁ ⰵⱄⱅⱏ ⱌⱄ҃ⱃⱄⱅⰲⰻⰵ ⰱⰶ҃ⰻⰵ.
10:15
ⰰⰿⰻⱀ ⰳⰾ҃ⱙ ⰲⰰⰿⱏ. ⰺⰶⰵ ⰰⱎⱅⰵ ⱀⰵ ⱂⱃⰻⰻⰿⰵⱅⱏ ⱌⱄ҃ⱃⱅⰲⰻⱑ ⰱⰶ҃ⰻⱑ. ⱑⰽⱁ ⱁⱅⱃⱁⱍⱔ. ⱀⰵ ⰻⰿⰰⱅⱏ ⰲⱏⱀⰻⱅⰻ ⰲⱐ ⱀⰵ.
10:16
ⰺ ⱁⰱⰵⰿⱏ ⱗ ⰱⰾⰰⰳⱁⱄⰾⱁⰲⰾⱑⰰⱎⰵ. ⰲⱏⰸⰾⰰⰳⰰⱗ ⱃⱘⱌⱑ ⱀⰰ ⱀⱔ ::
10:17
Ⰺ ⰻⱄⱈⱁⰴⱔⱎⱅⱓ ⰵⰿⱆ ⱀⰰ ⱂⱘⱅⱐ ⱂⱃⰻⰴⰵ ⰵⰴⰻⱀⱏ ⰺ ⱂⱁⰽⰾⱁⱀⱐ ⱄⱔ ⰵⰿⱆ ⱀⰰ ⰽⱁⰾⱑⱀⱆ ⰲⱏⱂⱃⰰⱎⰰⰰⱎⰵ ⰻ. ⱆⱍⰻⱅⰵⰾⱓ ⰱⰾⰰⰳⱏⰹ. ⱍⱅⱁ ⱄⱏⱅⰲⱁⱃⱙ ⰴⰰ ⰶⰻⰲⱁⱅⱏ ⰲⱑⱍⱏⱀⱏⰹ ⱀⰰⱄⰾⱑⰴⱏⱄⱅⰲⱆⱙ.
10:18
ⰺⱄ҃ ⰶⰵ [ⱃⰵ]ⱍⰵ ⰵⰿⱆ ⱍⱅⱁ ⰿⱔ ⰳⰾ҃ⱎⰻ ⰱⰾⰰⰳⰰ. ⱀⰻⰽⱅⱁⰶⰵ ⰱⰾⰰⰳⱏ ⱅⱏⰽⱏⰿⱁ ⰵⰴⰻⱀⱏ ⰱ҃ⱏ.
10:19
ⰸⰰⱂⱁⰲⱑⰴⰻ ⰲⱑⱄⰻ ⱀⰵ ⱂⱃⱑⰾⱓⰱⱏ ⰴⱑⰻ. ⱀⰵ ⱆⰱⰻ ⱀⰵ ⱆⰽⱃⰰⰴⰻ. ⱀⰵ ⰾⱏⰶⱔ ⱄⱏⰲⱑⰴⱑⱅⰵⰾⱐⱄⱅⰲⱆⰻ. ⱀⰵ ⱁⰱⰻⰴⰻ. ⱍⱅⰻ ⱁⱅ҃ⱌⰰ ⱅⰲⱁⰵⰳⱁ ⰻ !ⰿⱅⱃⱐ.
10:20
ⱁⱀⱏ ⰶⰵ ⱁⱅⱏⰲⱑⱋⰰⰲⱏ ⱃⰵⱍⰵ ⰵⰿⱆ. ⱆⱍⰻⱅⰵⰾⱓ ⰲⱐⱄⱑ ⱄⰻ ⱄⱏⱈⱃⰰⱀⰻⱈⱏ ⱁⱅⱏ ⱓⱀⱁⱄⱅⰻ ⰿⱁⰵⱗ.
10:21
ⰺⱄ҃ ⰶⰵ ⰲⱏⰸⱐⱃⱑⰲⱏ ⱀⰰ ⱀⱐ ⰲⱏⰸⰾⱓⰱⰻ ⰻ. ⰻ ⱃⰵⱍⰵ ⰵⰿⱆ. ⰵⰴⰻⱀⱁⰳⱁ ⰵⱄⰻ ⱀⰵ ⰴⱁⰽⱁⱀⱐⱍⰰⰾⱏ. ⰰⱎⱅⰵ ⱈⱁⱎⱅⰵⱎⰻ ⱄⱏⰲⱃⱏⱎⰵⱀⱏ ⰱⱏⰹⱅⰻ. ⰺⰴⰻ ⰵⰾⰻⰽⱁ ⰻⰿⰰⱎⰻ ⱂⱃⱁⰴⰰⰶⰴⱏ ⰻ ⰴⰰⰶⰴⱏ ⱀⰻⱎⱅⰻⰻⰿⱏ. ⰺ ⰻⰿⱑⱅⰻ ⰻⰿⰰⱎⰻ ⱄⱏⰽⱃⱁⰲⰻⱎⱅⰵ ⱀⰱ҃ⱄⰵ. ⰺ ⱂⱃⰻⰴⰻ ⱈⱁⰴⰻ ⰲⱏ ⱄⰾⱑⰴⱏ ⰿⰵⱀⰵ ⰲⱏⰸⰵⰿⱏ !ⰽⱃⱄⱅⱏ.
10:22
ⱁⱀⱏ ⰶⰵ ⰴⱃⱔⱈⰾⱏ ⰱⱏⰹⰲⱏ ⱁ ⱄⰾⱁⰲⰵⱄⰻ. ⱁⱅⰻⰴⰵ ⱄⰽⱃⱏⰱⱔ. ⰱⱑ ⰱⱁ ⰻⰿⱑⱗ ⱄⱏⱅⱔⰶⰰⱀⰻⱑ ⰿⱏⱀⱁⰳⰰ.
10:23
ⰺ ⰲⱏⰸⱐⱃⱑⰲⱏ ⰻⱄ҃ⱏ ⰳⰾ҃ⰰ ⱆⱍⰵⱀⰻⰽⱁⰿⱏ ⱄⰲⱁⰻⰿⱏ. ⰽⰰⰽⱁ ⱀⰵ ⱆⰴⱁⰱⱐ ⰻⰿⱘⱋⰵⰻ ⰱⱁⰳⰰⱅⱏⱄⱅⰲⱁ. ⰲⱏ !ⱌⱃⱄⱅⰲⰻⰵ ⰱⰶ҃ⰻⰵ ⰲⱏⱀⰻⰴⱘⱅⱏ.
10:24
ⱆⱍⰵⱀⰻⱌⰻ ⰶⰵ ⱆⰶⰰⱄⰰⰰⱈⱘ ⱄⱔ ⱁ ⱄⰾⱁⰲⰵⱄⰵⱈⱏ ⰵⰳⱁ. ⰺⱄ҃ ⰶⰵ ⱂⰰⰽⱏⰹ ⱁⱅⱏⰲⱑⱎⱅⰰⰲⱏ ⰳⰾ҃ⰰ ⰻⰿⱏ ⱍⱔⰴⰰ. ⰽⰰⰽⱁ ⱀⰵ ⱆⰴⱁⰱⱐ ⰵⱄⱅⱏ ⱆⱂⱏⰲⰰⱙⱎⱅⰻⰿⱏ ⱀⰰ ⰱⰳⰰⱅⱏⱄⱅⰲⱁ. ⰲⱏ !ⱌⱑⱄⱃⱄⱅⰲⰻⰵ ⰱⰶ҃ⰻⰵ ⰲⱐⱀⰻⱅⰻ.
10:25
ⱆⰴⱁⰱⱑⰵ ⰵⱄⱅⱏ ⰲⰵⰾⱐⰱⱘⰴⱆ ⱄⰽⰲⱁⰸⱑ ⰻⰳⱏⰾⰻⱀⱑ ⱆⱎⰻ ⱂⱃⱁⰻⱅⰻ. ⱀⰵⰶⰵ ⰱⱁⰳⰰⱅⱆ ⰲⱏ ⱌⱄ҃ⱃⱄⱅⰲⰻⰵ ⰱⰶ҃ⰻⰵ ⰲⱏⱀⰻⱅⰻ.
10:26
ⱁⱀⰻ ⰶⰵ ⰻⰸⰾⰻⱈⰰ ⰴⰻⰲⰾⱑⰰⱈⱘ ⱄⱔ ⰳⰾ҃ⱙⱎⱅⰵ ⰽⱏ ⱄⰵ[ⰱ]ⱑ. ⰽⱅⱁ ⰿⱁⰶⰵⱅⱏ ⱄⱂ҃ⱄⱀⱏ ⰱⱏⰹⱅⰻ.
10:27
ⰻ ⰲⱏⰸⱏⱃⱑⰲⱏ ⱀⰰ ⱀⱔ ⰻⱄ҃ⱏ ⰳⰾ҃ⰰ. ⱁⱅⱏ ⱍⰾⰲ҃ⰽⱏ ⱀⰵ ⰲⱏⰸⰿⱁⰶⱏⱀⱁ ⱀⱏ ⱁⱅⱏ ⰱ҃ⰰ. ⰲⱐⱄⱑ ⰱⱁ ⰲⱏⰸⰿⱁⰶⱏⱀⰰ ⱁⱅⱏ ⰱ҃ⰰ ⱄⱘⱅⱏ ::
10:28
Ⱀⰰⱍⱔⱅⱏ ⰶⰵ ⱂⰵⱅⱃⱏ ⰳⰾ҃ⰰⱅⰻ ⰵⰿⱆ. ⱄⰵ ⰿⱏⰹ ⱁⱄⱅⰰⰲⰻⱈⱁⰿⱏ ⰲⱐⱄⱑ ⰻ ⰲⱏ ⱄⰾⱑⰴⱏ ⱅⰵⰱⰵ ⰻⰴⱁⰿⱏ.
10:29
ⱁⱅⱏⰲⱑⱎⱅⰰⰲⱏ ⰶⰵ ⰺⱄ҃ⱏ ⱃⰵⱍⰵ. ⰰⰿⰻⱀⱐ ⰳⰾ҃ⱙ ⰲⰰⰿⱏ. ⱀⰻⰽⱅⱁⰶⰵ ⰵⱄⱅⱏ ⰻⰶⰵ ⱁⱄⱅⰰⰲⰻⱅⱏ ⰴⱁⰿⱏ. ⰾⰻ ⰱⱃⰰⱅⱃⰻⱙ ⰾⰻ ⱄⰵⱄⱅⱃⱏⰹ. ⰾⰻ ⱁⱅ҃ⱌⰰ ⰻⰾⰻ ⰿⰰⱅⰵⱃⱐ. ⰾⰻ ⰶⰵⱀⱘ ⰾⰻ ⱍⱔⰴⰰ ⰾⰻ ⱄⰵⰾⰰ ..... ⰿⰵⱀⰵ ⱃⰰⰴⰻ ⰻ ⰵⰲⰰⱀⰼ҃ⰾⰻⱑ.
10:30
ⰰⱎⱅⰵ ⱀⰵ ⰻⰿⰰⱅⱏ ⱂⱃⰻⱗⱅⰻ ⱄⱏⱅⱁⱃⰻⱌⰵⱙ ⰲⱏ ⰲⱃⱑⰿⱔ ⱄⰵ ⱀⱏⰹⱀⱑ ⰴⱁⰿⱁⰲⱏ ⰻ ⰱⱃⰰⱅⱃⰻⱗ ⰻ ⱄⰵⱄⱅⱃⱏ. ⰺ ⱁⱅ҃ⱌⰰ ⰻ ⰿⰰⱅⰵⱃⱏ ⰻ ⱍⱔⰴⱏ ⰻ ⱄⰵⰾⱏ. ⱂⱁ ⰻⰸⰳⱏⱀⰰⱀⰻⰻ. ⰺ ⰲⱐ ⰲⱑⰽⱏ ⰳⱃⱔⰴⱘⱎⱅⰻⰻ ⰶⰻⰲⱁⱅⱏ ⰲⱑⱍⱐⱀⱏⰹⰻ.
10:31
ⰿⱏⱀⱁⰷⰻ ⰶⰵ ⰱⱘⰴⱘⱅⱏ ⱂⱃⱏⰲⰻⰻ ⱂⱁⱄⰾⱑⰴⱐⱀⰻⰻ. ⰺ ⱂⱁⱄⰾⱑⰴⱐⱀⰻⰻ ⱂⱃⱏⰲⰻⰻ.
10:32
ⰱⱑⰰⱈⱘ ⰶⰵ ⱀⰰ ⱂⱘⱅⰻ ⰲⱏⱄⱈⱁⰴⱔⱋⰵ !ⰲⰾⰿⱏ. ⰺ ⰱⱑ ⰲⰰⱃⱑⱗ ⰻⱄ҃ⱏ. ⰺ ⱆⰶⰰⱄⰰⰰⱈⱘ ⱄⱔ. ⰺ ⱂⱁⱄⰾⱑⰴⱐ ⰳⱃⱔⰴⱘⱎⱅⰵ ⰱⱁⱑⰰⱈⱘ ⱄⱔ ::. Ⰺ ⱂⱁⰵⰿⱏ ⰻⱄ҃ⱏ ⱂⰰⰽⱏⰹ ⱁⰱⰰ ⱀⰰ ⰴⰵⱄⱔⱅⰵ. ⱀⰰⱍⱔⱅⱏ ⰻ҅ⰿⱏ ⰳⰾ҃ⱅⰻ. ⰵⰶⰵ ⱈⱁⱅⱑⰰⱎⰵ ⰱⱏⰹⱅⰻ ⰵⰿⱆ.
10:33
ⱑⰽⱁ ⱄⰵ ⰲⱏⱄⱈⱁⰴⰻⰿⱏ !ⰲⰾⰿⱏ. ⰺ ⱄⱀ҃ⱏ !ⱍⰽⱄⰽⱏⰹ ⱂⱃⱑⰴⰰⱀⱏ ⰱⱘⰴⰵⱅⱏ ⰰⱃⱈⰻⰵⱃⰵⱁⰿⱏ ⰻ ⰽⱏⱀⰻⰶⱏⱀⰻⰽⱁⰿⱏ. ⰺ ⱁⱄⱘⰴⱔⱅⱏ ⰹ ⱀⰰ ⱄⱏⰿ[ⱃ]ⱏⱅⱐ. ⰺ ⱂⱃⱑⰴⰰⰴⱔⱅⱏ ⰹ !ⱗⰸⰽⰿⱏ.
10:34
ⰺ ⱂⱁⱃⱘⰳⰰⱙⱅⱏ ⱄⱔ ⰵⰿⱆ ⰻ ⱆⰱⰻⱙⱅⱏ ⰹ. ⰻ ⱅⱃⰵⱅⰻⰻ ⰴⰵⱀⱐ ⰲⱐⱄⰽⱃⱏⱄⱀⰵⱅⱏ ::
10:35
ⰺ҅ ⱂⱃⱑⰴⱏ ⱀⰻⰿⱏ ⰻⰴⰵⱅⰵ ⰻⱑⰽⱁⰲⱏ ⰻ [ⰻ]ⱁⰰⱀⱏ. ⱄⱏⰹⱀⰰ ⰸⰵⰲⰵⰴⰵⱁⰲⰰ ⰳⰾ҃ⱙⱎⱅⰰ ⰵⰿⱆ. ⱆⱍⰻⱅⰵⰾⱓ ⱈⱁⱎⱅⰵⰲⱑ ⰴⰰ ⰵⰳⱁⰶⰵ ⰰⱋⰵ ⱂⱃⱁⱄⰻⰲⱑ ⱄⱏⱅⰲⱁⱃⰻⱎⰻ ⱀⰰⰿⰰ.
10:36
ⰺⱄ҃ ⰶⰵ ⱃⰵⱍⰵ ⰻⰿⰰ ⱍⱅⱁ ⱈⱁⱎⱅⰵⱅⰰ ⰴⰰ ⱄⱏⱅⰲⱁⱃⱙ ⰲⰰⰿⰰ.
10:37
ⱁⱀⰰ ⰶⰵ ⱃⱑⱄⱅⰵ ⰵⰿⱆ. ⰴⰰⰶⰴⱏ ⱀⰰⰿⰰ ⰴⰰ ⰵⰴⰻⱀⱏ ⱁ ⰴⰵⱄⱀⱘⱙ ⱅⰵⰱⰵ. ⰻ ⰵⰴⰻⱀⱏ ⱁ ⱎⱓⱙ ⱅⰵⰱⰵ ⱄⱔⰴⰵⰲⱑ ⰲⱏ ⱄⰾⰰⰲⱑ ⱅⰲⱁⰵⰻ
10:38
ⰻⱄ҃ ⰶⰵ ⱃⰵⱍⰵ ⰻⰿⰰ. ⱀⰵ ⰲⱑⱄⱅⰰ ⱄⱔ ⱍⰵⱄⱁ ⱂⱃⱁⱄⱔⱎⱅⰰ. ⰿⱁⰶⰵⱅⰰ ⰾⰻ ⱂⰻⱅⰻ ⱍⰰⱎⱘ ⱙⰶⰵ ⰰⰸⱏ ⱂⰻⱙ. ⰾⰻ ⰽⱃⱏⱋⰵⱀⰻⰵⰿⱏ ⰻⰿⱏⰶⰵ ⰰⰸⱏ ⰽⱃⱏⱎⱅⰰⱙ ⱄⱔ ⰽⱃⱏⱄⱅⰻⱅⰻ ⱄⱔ.
10:39
ⱁⱀⰰ ⰶⰵ ⱃⱑⱄⱅⰵ ⰵⰿⱆ ⰿⱁⰶⰵⰲⱑ. ⰺⱄ҃ ⰶⰵ ⱃⰵⱍⰵ ⰻⰿⰰ. ⱍⰰⱎⱘ ⱆⰱⱁ ⱙⰶⰵ ⰰⰸⱏ ⱂⰻⱙ ⰻⱄⱂⰻⰵⱅⰰ. ⰻ ⰽⱃⱏⱎⱅⰵⱀⰻⰵⰿⱐ ⰻⰿⱏⰶⰵ ⰰⰸⱏ ⰽⱃⱏⱎⱅⰰⱙ ⱄⱔ ⰽⱃⱏⱄⱅⰻⱅⰰ ⱄⱔ.
10:40
ⰰ ⰵⰶⰵ ⱄⱑⱄⱅⰻ ⱁ ⰴⰵⱄⱀⱘⱙ ⰿⰵⱀⰵ ⰻ ⱁ ⱎⱓⱙⱘ. ⱀⱑⱄⱅⱏ ⰿⱐⱀⱑ ⰴⰰⱅⰻ. ⱀⱏ ⰻⰿⱏⰶⰵ ⰵⱄⱅⱏ ⱆⰳⱁⱅⱁⰲⰰⱀⱁ.
10:41
Ⰺ ⱄⰾⱏⰹⱎⰰⰲⱏⱎⰵ ⰴⰵⱄⱔⱅⱐ ⱀⰰⱍⱔⱄⱔ ⱀⰵⰳⱁⰴⱁⰲⰰⱅⰻ. ⱁ ⰻⱑⰽⱁⰲⱑ. ⰺ ⰻⱁⰰⱀⱑ.
10:42
ⰺⱄ҃ ⰶⰵ ⱂⱃⰻⰸⱏⰲⰰⰲⱏ ⱗ ⰳⰾ҃ⰰ ⰻⰿⱏ. ⰲⱑⱄⱅⰵ ⱑⰽⱁ ⰿⱐⱀⱔⱎⱅⰵⰻ ⱄⱔ ⰲⰾⰰⱄⱅⰻ !ⱗⰸⰽⱏⰹ ⱆⱄⱅⱁⱗⱅⱏ ⰻⰿⱏ. ⰻ ⰲⰵⰾⰻⱌⰻ ⰻⱈⱏ ⱁⰱⰾⰰⰴⰰⱙⱅⱏ ⰻⰿⰻ.
10:43
ⱀⰵ ⱅⰰⰽⱁⰶⰴⰵ ⰶⰵ ⰱⱘⰴⰻ ⰲⱏ ⰲⰰⱄⱏ.
10:44
ⱀⱏ ⰻⰶⰵ ⰰⱎⱅⰵ ⱈⱁⱎⱅⰵⱅⱏ ⰲⱔⱎⱅ ⰻ҅ ⰱⱏⰹⱅⰻ ⰲⱏ ⰲⰰⱄⱏ. ⰴⰰ ⰱⱘⰴⰵⱅⱏ ⰲⰰⰿⱏ ⱄⰾⱆⰳⰰ. ⰺ ⰻⰶⰵ ⰰⱎⱅⰵ ⱈⱁⱋⰵⱅⱏ ⰲⱏ ⰲⰰⱄⱏ ⰱⱏⰹⱅⰻ ⱄⱅⰰⱃⱑⰻ. ⰴⰰ ⰱⱘⰴⰵⱅⱏ ⰲⱐⱄⱑⰿⱏ ⱃⰰⰱⱏ.
10:45
ⰺⰱⱁ ⱄⱀ҃ⱏ ⱍⰾⰲ҃ⱑⱍⱐⱄⰽⱏⰹ ⱀⰵ ⱂⱃⰻⰴⰵ ⰴⰰ ⱂⱁⱄⰾⱆ[ⰶⱔ]ⱅⱏ ⰵⰿⱆ ⱀⱏ ⱂⱁⱄⰾⱆⰶⰻⱅⱏ. ⰺ ⰴⰰⱅⰻ ⰴⱎ҃ⱘ ⱄⰲⱁⱙ ⰻⰸⰱⰰⰲⰾⰵⱀⰻⰵ ⰸⰰ ⰿⱏⱀⱁⰳⱏⰹ :: ⰽ!ⱌ ::
10:46
ⰻ ⱂⱃⰻⰴⱘ ⰲⱏ ⰵⱃⰻⱈⱘ. ⰺⱄⱈⱁⰴⱔⱎⱅⱓ ⰵⰿⱆ ⱁⱅⱏ ⰻⰵⱃⰻⱈⱁⱀⰰ. ⰺ ⱆⱍⰵⱀⰻⰽⱁⰿⱏ ⰵⰳⱁ. ⰺ ⱀⰰⱃⱁⰴⱆ ⰿⱏⱀⱁⰳⱆ. ⱄⱏⰹⱀⱏ ⱅⰻⰿⰵⱁⰲⱏ ⰲⰰⱃⱅⰻⰿⰵⰻ. ⱄⰾⱑⱂⱏ ⱄⱑⰴⱑⰰⱎⰵ ⱂⱃⰻ ⱂⱘⱅⰻ ⱈⰾⱘⰱ ⱗ҅.
10:47
ⰺ ⱄⰾⱏⰹⱎⰰⰲⱏ ⱑⰽⱁ ⰻⱄ҃ⱏ ⱀⰰⰸⰰⱃⱑⱀⰻⱀⱏ ⰵⱄⱅⱏ. ⱀⰰⱍⱔⱅⱏ ⰸⱏⰲⰰⱅⰻ ⰻ ⰳⰾ҃ⰰⱅⰻ. ⱄⱀ҃ⰵ !ⰴⰲⰴⰲⱏ ⰻⱄ҃ ⱂⱁⰿⰻⰾⱆⰻ ⰿⱔ.
10:48
ⰺ ⱂⱃⱑⱋⰰⰰⱈⱘ ⰵⰿⱆ ⰿⱏⱀⱁⰷⰻ ⰴⰰ ⱆⰿⰾⱏⱍⰻⱅⱏ. ⱁⱀⱏ ⰶⰵ ⰻⰸⰾⰻⱈⰰ ⰲⱏⱂⰻⱑⱎⰵ. ⱄⱀ҃ⰵ ⰴⰰⰲⱏⰹⰴⱁⰲⱏ ⱂⱁⰿⰻⰾⱆⰻ ⰿⱔ.
10:49
ⰺ ⱄⱅⰰⰲⱏ ⰻⱄ҃ⱏ ⱃⰵⱍⰵ ⰲⱏⰸⰳ[ⰾ]ⰰⱄⰻⱅⰻ ⰻ. ⰺ ⰸⱏⰲⰰⰰⱈⱘ ⱄⰾⱑⱂⱏⱌⰰ ⰳⰾ҃ⱙⱎⱅⰵ ⰵⰿⱆ ⰴⱃⱏⰸⰰⰻ. ⰲⱏⱄⱅⰰⱀⰻ ⰸⱁⰲⰵⱅⱏ ⱅⱔ.
10:50
ⱁⱀⱏ ⰶⰵ ⱁⱅⱏⰲⱃⱏⰳⱏ ⱃⰻⰸⱏⰹ ⱄⰲⱁⱗ ⰲⱏⱄⱅⰰⰲⱏ ⱂⱃⰻⰴⰵ ⰽⱏ ⰻⱄ҃ⰲⰻ.
10:51
ⰺ ⱁⱅⱏⰲⱑⱎⱅⰰⰲⱏ ⰳⰾ҃ⰰ ⰵⰿⱆ ⰻⱄ҃ⱏ. ⱍⰵⱄⱁⰿⱆ ⱈⱁⱋⰵⱎⰻ ⰴⰰ ⱄⱏⱅⰲⱁⱃⱙ ⱅⰵⰱⱑ. ⱄⰾⱑⱂⰵⱌⱏ ⰶⰵ ⰳⰾ҃ⰰ ⰵⰿⱆ. ⱃⰰⰲⰲⱆⱀⰻ ⰴⰰ ⱂⱃⱁⰸⱐⱃⱙ.
10:52
ⰺⱄ҃ ⰶⰵ ⱃⰵⱍⰵ ⰵⰿⱆ. ⰺⰴⰻ ⰲⱑⱃⰰ ⱅⰲⱁⱑ ⱄⱂ҃ⱄⱅⱔ. ⰻ ⰰⰱⰻⰵ ⱂⱃⱁⰸⱐⱃⱑ. ⰺ ⱂⱁ ⰻⱄ҃ⱑ ⰻⰴⰵ ⰲⱏ ⱂⱘⱅⱏ.