ЕВАНГЕЛИЕ ЕЖЕ Ѿ ЛОУКꙐ
14:1
Ⰺ ⰱⱏⰹⱄⱅⱏ ⰵⰳⰴⰰ ⰲⱐⱀⰻⰴⰵ ⰻⱄ҃ⱏ ⰲⱏ ⰴⱁⰿⱏ ⰵⰴⰻⱀⱁⰳⱁ ⰽⱏⱀⱔⰷⰰ ⱇⰰⱃⰻⱄⱑⰻⱄⰽⰰ ⰲⱏ ⱄⱁⰱⱁⱅⱘ ⱈⰾⱑⰱⰰ ⱑⱄⱅⱏ. ⰻ ⱅⰻ ⰱⱑⰰⱈⱘ ⱀⰰⰸⰻⱃⰰⱙⱎⱅⰵ ⰻ.
14:2
ⰺ ⱄⰵ ⱍⰾⰲ҃ⰽⱏ ⰵⰴⰻⱀⱏ ⰻⰿⱏⰹ ⰲⱁⰴⱏⱀⱏⰹⰻ ⱅⱃⱘⰴⱏ. ⰱⱑ ⱂⱃⱑⰴⱏ ⱀⰻⰿⱐ.
14:3
ⰻ ⱁⱅⱏⰲⱑⱎⱅⰰⰲⱏ ⱃⰵⱍⰵ ⰻⱄ҃ⱏ ⱃⰵⱍⰵ ⰽⱏ ⰸⰰⰽⱁⱀⱐⱀⰻⰽⱁⰿⱏ ⰻ ⱇⰰⱃⰻⱄⱑⰵⰿⱏ ⰳⰾ҃ⱔ. ⰰⱎⱅⰵ ⰴⱁⱄⱅⱁⰻⱅⱏ ⰲⱏ ⱄⱁⰱⱁⱅⱏⰹ ⱌⱑⰾⰻⱅⰻ. ⱁⱀⰻ ⰶⰵ ⱆⰿⰾⱏⱍⰰⱎⱔ.
14:4
ⰻ ⱂⱃⰻⰵⰿⱏ ⰻ ⰻⱄⱌⱑⰾⰻ ⰻ ⰻ ⱁⱅⱏⱂⱆⱄⱅⰻ ⰻ.
14:5
ⰻ ⱁⱅⱏⰲⱑⱎⱅⰰⰲⱏ ⰽⱏ ⱀⰻⰿⱏ ⱃⰵⱍⰵ. ⰽⱁⱅⱁⱃⰰⰰⰳⱁ ⰲⰰⱄⱏ ⱁⱄⱏⰾⱏ ⰾⰻ ⰲⱁⰾⱏ ⰲⱏ ⱄⱅⱆⰴⰵⱀⰵⱌⱏ ⰲⱏⱂⰰⰴⰵⱅⱏ. ⰺ ⱀⰵ ⰰⰱⰻⰵ ⰻⱄⱅⱃⱏⰳⱀⰵⱅⱏ ⰵⰳⱁ. ⰲⱐ ⰴⰵⱀⱐ ⱄⱁⰱⱁⱅⱏⱀⱏⰹ.
14:6
ⰺ ⱀⰵ ⰲⱏⰸⰿⱁⰳⱘ ⱁⱅⱏⰲⱑⱎⱅⰰⱅⰻ ⰵⰿⱆ ⰽⱏ ⱄⰵⰿⱆ ::
14:7
!Ⰳⰾⰰⰰⱎⰵ ⰶⰵ ⰽⱏ ⰸⱏⰲⰰⱀⱏⰻⰻⰿⱏ ⱂⱃⰻⱅⱏⱍⱘ ⱁⰴⱃⱏⰶⱔ. ⰽⰰⰽⱁ ⱂⱃⱑⰴⱏⱄⱑⰴⰰⱀⰻⱑ ⰻⰸⰱⰻⱃⰰⰰⱈⱘ. ⰳⰾ҃ⱔ ⰽⱏ ⱀⰻⰿⱐ.
14:8
ⰵⰳⰴⰰ ⰸⱏⰲⰰⱀⱏ ⰱⱘⰴⰵⱎⰻ ⱌⱑⰿⱏ ⱀⰰ ⰱⱃⰰⰽⱏ. ⱀⰵ ⱄⱔⰴⰻ ⱀⰰ ⱂⱃⱑⰴⱐⱀⰻⰿⱐ ⰿⱑⱄⱅⱑ. ⰵⰴⰰ ⰽⱏⱅⱁ ⱍⱐⱄⱅⱐⱀⱑⰻ ⱅⰵⰱⰵ ⰱⱘⰴⰵⱅⱏ ⰸⱏⰲⰰⱀⱏⰹⱈⱏ.
14:9
ⰺ ⱂⱃⰻⱎⰵⰴⱏ ⰸⱏⰲⰰⰲⱏⰹ ⱅⱔ ⰻ ⱁⱀⱁⰳⱁ ⱃⰵⱍⰵⱅⱏ ⱅⰻ. ⰴⰰⰶⰴⱏ ⱄⰵⰿⱆ ⰿⱑⱄⱅⱁ. ⰻ ⱅⱁⰳⰴⰰ ⱀⰰⱍⱐⱀⰵⱎⰻ ⱄⱏ ⱄⱅⱆⰴⱁⰿⱏ ⱂⱁⱄⰾⱑⰴⱐⱀⰵⰵ ⰿⱑⱄⱅⱁ ⰴⱃⱏⰶⰰⱅⰻ.
14:10
ⱀⱏ ⰵⰳⰴⰰ ⰸⱏⰲⰰⱀⱏ ⰱⱘⰴⰵⱎⰻ. ⱎⱏⰴⱏ ⱄⱔⰴⰻ ⱀⰰ ⱂⱁⱄⰾⱑⰴⱐⱀⰻⰻⰿⱐ ⰿⱑⱄⱅⱑ. ⰴⰰ ⰵⰳⰴⰰ ⱂⱃⰻⰴⰵⱅⱏ ⰸⱏⰲⰰⰲⱏⰹⰻ ⱅⱔ. ⱃⰵⱍⰵⱅⱏ ⱅⰻ ⰴⱃⱆⰶⰵ ⱂⱁⱄⱔⰴⰻ ⰲⱏⰹⱎⰵ. ⱅⱏⰳⰴⰰ ⰱⱘⰴⰵⱅⱏ ⱅⰻ ⱄⰾⰰⰲⰰ ⱂⱃⱑⰴⱏ ⱄⱑⰴⱔⱎⱅⰻⰻⰿⰻ ⱄⱏ ⱅⱁⰱⱁⱙ.
14:11
ⱑⰽⱁ ⰲⱐⱄⱑⰽⱏ ⰲⱏⰸⱀⱁⱄⱔⰻ ⱄⱔ ⱄⱏⰿⱑⱃⰻⱅⱏ ⱄⱔ. ⰻ ⱄⱏⰿⱑⱃⱑⱗⰻ ⱄⱔ ⰲⱐⰸⱀⰵⱄⰵⱅⱏ ⱄⱔ :: ⰽ!ⱌ ::
14:12
!Ⰳⰾⰰⰰⱎⰵ ⰶⰵ ⰽⱏ ⰸⱏⰲⰰⰲⱏⱎⱓⰿⱆ ⰻ. ⰵⰳⰴⰰ ⱅⰲⱁⱃⰻⱎⰻ ⱁⰱⱑⰴⱏ ⰾⰻ ⰲⰵⱍⰵⱃⱙ. ⱀⰵ ⰸⱁⰲⰻ ⰴⱃⱆⰳⱏ ⱅⰲⱁⰻⱈⱏ. ⱀⰻ ⰱⱃⰰⱅⱃⰻⱗ ⱅⰲⱁⰵⱗ ⱀⰻ ⱃⱁⰶⰴⰵⱀⰻⱑ ⱅⰲⱁⰵⰳⱁ. ⱀⰻ ⱄⱘⱄⱑⰴⱏ ⰱⱁⰳⰰⱅⱏ. ⰵⰴⰰ ⰽⱁⰾⰻ ⰻ ⱅⰻ ⱅⱔ ⱅⰰⰽⱁⰶⰴⰵ ⰲⱏⰸⱁⰲⱘⱅⱏ. ⰻ ⰱⱘⰴⰵⱅⱏ ⱅⰻ ⰲⱏⰸⰴⰰⰰⱀⰻⰵ.
14:13
ⱀⱏ ⰵⰳⰴⰰ ⱅⰲⱁⱃⰻⱎⰻ ⱂⰻⱃⱏ. ⰸⱁⰲⰻ ⱀⰻⱎⱅⱔⱗ ⰿⰰⰾⱁⰿⱁⱎⱅⰻ. ⱈⱃⱁⰿⱏⰹ ⱄⰾⱑⱂⱏⰹ.
14:14
ⰺ ⰱⰾⰰⰶⰵⱀⱏ ⰱⱘⰴⰵⱎⰻ. ⱑⰽⱁ ⱀⰵ ⰻⰿⱘⱅⱏ ⱅⰻ ⱍⰵⱄⱁ ⰲⱏⰸⰴⰰⱅⰻ ⱅⰻ. ⰲⱏⰸⰴⰰⱄⱅⱏ ⰱⱁ ⱅⰻ ⱄⱔ ⰲⱁ ⰲⱐⱄⰽⱃⱑⱎⰵⱀⰻⰵ ⱂⱃⰰⰲⰵⰴⱏⱀⱏⰹⱈⱏ.
14:15
Ⱄⰾⱏⰹⱎⰰⰲⱏ ⰶⰵ ⰵⰴⰻⱀⱏ ⱁⱅⱏ ⰲⱏⰸⰾⰵⰶⱔⱎⱅⰻⰻⱈⱏ ⱄⱏ ⱀⰻⰿⱏ ⱄⰻ ⱃⰵⱍⰵ ⰵⰿⱆ. ⰱⰾⰰⰶⰵⱀⱏ ⰻⰶⰵ ⱄⱏⱀⱑⱄⱅⱏ ⱁⰱⱑⰴⱏ ⰲⱏ ⱌⱄ҃ⱃⱄⱅⰲⰻⰻ ⰱⰶ҃ⰻⰻ.
14:16
ⱁⱀⱏ ⰶⰵ ⱃⰵⱍⰵ ⰵⰿⱆ :: !Ⱍⰾⰲⰽⱏ ⰵⰴⰻⱀⱏ ⱄⱏⱅⰲⱁⱃⰻ ⰲⰵⱍⰵⱃⱙ ⰲⰵⰾⰻⱙ. ⰻ ⰸⱏⰲⰰ ⰿⱏⱀⱁⰳⱏⰹ.
14:17
ⰻ ⱂⱁⱄⱏⰾⰰ ⱃⰰⰱⱏ ⱄⰲⱁⰻ ⰲⱏ ⰳⱁⰴⱏ ⰲⰵⱌⰵⱃⱔ. ⱃⰵⱎⱅⰻ ⰸⱏⰲⰰⱀⱏⰹⰿⱏ ⰳⱃⱔⰴⱑⱅⰵ. ⱑⰽⱁ ⱁ҅уⰶⰵ ⰳⱁⱅⱁⰲⰰ ⱄⱘⱅⱏ ⰲⱐⱄⱑ.
14:18
ⰺ ⱀⰰⱍⱔⱄⱔ ⰲⱏⰽⱆⱂⱏ ⱁⱅⱏⱃⰻⱌⰰⱅⰻ ⱄⱔ ⰲⱐⱄⰻ. ⱂⱃⱏⰲⱏⰹ ⱃⰵⱍⰵ ⰵⰿⱆ. ⱄⰵⰾⱁ ⰽⱆⱂⰻⱈⱏ ⰻ ⰻⰿⰰⰿⱏ ⱀⱘⰶⰴⱘ ⰻⰸⰻⱅⰻ ⰻ ⰲⰻⰴⱑⱅⰻ ⰵ. ⰿⱁⰾⱙ ⱅⱔ ⰻⰿⱑⰻ ⰿⱔ ⱁⱅⱏⱃⱁⱍⱏⱀⰰ.
14:19
ⰻ ⰴⱃⱆⰳⱏⰹ ⱃⰵⱍⰵ ⱄⱘⱂⱃⱘⰳⱏ ⰲⱁⰾⱁⰲⱏⱀⱏⰹⰻⱈⱏ ⰽⱆⱂⰻⱈⱏ ⱂⱔⱅⱐ. ⰻ ⰳⱃⱔⰴⱘ ⰻⱄⰽⱆⱄⰻⱅⱏ ⰻⱈⱏ. ⰿⱁⰾⱙ ⱅⱔ ⰻⰿⱑⰻ ⰿⱔ ⱁⱅⱏⱃⱁⱍⱏⱀⰰ.
14:20
ⰻ ⰴⱃⱆⰳⱏⰹ ⱃⰵⱍⰵ ⰶⰵⱀⱁ ⱂⱁⱗⱄⱏ ⰻ ⱄⰵⰳⱁ ⱃⰰⰴⰻ ⱀⰵ ⰿⱁⰳⱘ ⱂⱃⰻⱅⰻ.
14:21
ⰻ ⱂⱃⰻⱎⱏⰴⱏ ⱃⰰⰱⱏ ⱅⱏ ⱂⱁⰲⱑⰴⱑ ⱄⰵ !ⰳⱄⱂⰴⰻⱀⱆ ⱄⰲⱁⰵⰿⱆ. ⱅⱁⰳⰴⰰ ⱃⰰⰸⰳⱀⱑⰲⰰⰲⱏ ⱄⱔ ⰳⱁⱄⱂⱁⰴⰻⱀⱏ ⰴⱁⰿⱆ. ⱃⰵⱍⰵ ⱃⰰⰱⱆ ⱄⰲⱁⰵⰿⱆ. ⰻⰸⰻⰴⰻ ⱗⰴⱃⱁ ⱀⰰ ⱃⰰⱄⱂⱘⱅⰻⱑ ⰻ ⱄⱅⱏⰳⱀⱏⰹ ⰳⱃⰰⰴⰰ. ⰺ ⱀⰻⱎⱅⱔⱗ ⰻ ⰱⱑⰴⱏⱀⱏⰹⱗ ⰻ ⱈⱃⱁⰿⱏⰹⱗ ⰻ ⱄⰾⱑⱂⱏⰹⱗ ⰲⱏⰲⰵⰴⰻ ⱄⱑⰿⱁ.
14:22
ⰺ ⱃⰵⱍⰵ ⱃⰰⰱⱏ. ⰳ҃ⰻ ⰱⱏⰹⱄⱅⱏ ⱑⰽⱁⰶⰵ ⱂⱁⰲⰵⰾⱑ. ⰻ ⰵⱎⱅⰵ ⰿⱑⱄⱅⱁ ⰵⱄⱅⱏ.
14:23
ⰻ ⱃⰵⱍⰵ ⰳ҃ⱏ ⱃⰰⰱⱆ. ⰻⰸⰻⰴⰻ ⱀⰰ ⱂⱘⱅⰻ ⰻ ⱈⰰⰾⱘⰳⱏⰹ. ⰻ ⱆⰱⱑⰴⰻ ⰲⱐⱀⰻⱅⰻ. ⰴⰰ ⱀⰰⱂⰾⱏ{ⱀⰰⱂⰾⱏ}ⱀⰻⱅⱏ ⱄⱔ ⰴⱁⰿⱏ ⰿⱁⰻ.
14:24
ⰳⰾ҃ⱙ ⰱⱁ ⰲⰰⰿⱏ. ⱑⰽⱁ ⱀⰻ ⰵⰴⰻⱀⱏ ⰶⰵ ⰿⱘⰶⱐ ⱅⱑⱈⱏ ⰸⱏⰲⰰⱀⱏⰹⱈⱏ. ⱀⰵ ⰲⱏⰽⱆⱄⰻⱅⱏ ⰿⱁⰵⱗ ⰲⰵⱍⰵⱃⱔ. ⰿⱏⱀⱁⰷⰻ ⰱⱁ ⱄⱘⱅⱏ ⰸⱏⰲⰰⱀⰻⰻ ⰿⰰⰾⱁ ⰶⰵ ⰻⰸⰱⱏⱃⰰⱀⱏⰹⱈⱏ :: ⰽ!ⱌ ::
14:25
Ⰺⰴⱑⰰⱈⱘ ⰶⰵ ⱄⱏ ⱀⰻⰿⱐ ⱀⰰⱃⱁⰴⰻ ⰿⱏⱀⱁⰷⰻ. ⰻ ⱁⰱⱃⰰⱎⱅⱏ ⱄⱔ ⱃⰵⱍⰵ ⰽⱏ ⱀⰻⰿⱏ.
14:26
ⰰⱎⱅⰵ ⰽⱅⱁ ⰳⱃⱔⰴⰵⱅⱏ ⰽⱏ ⰿⱐⱀⱑ. ⰻ ⱀⰵ ⰲⱏⰸⱀⰵⱀⰰⰲⰻⰴⰻⱅⱏ ⱁⱅ҃ⱌⰰ ⱄⰲⱁⰵⰳⱁ ⰻ ⰿⰰⱅⰵⱃⰵ. ⰻ ⰶⰵⱀⱏⰻ ⰻ ⱍⱔⰴⱏ ⰻ ⰱⱃⰰⱅⱃⰻⱗ ⰻ ⱄⰵⱄⱅ!ⱃⱏ. ⰵⱎⱅⰵ ⰶⰵ ⰻ ⰴⱎ҃ⱔ ⱄⰲⱁⰵⱗ. ⱀⰵ ⰿⱁⰶⰵⱅⱏ ⰿⱁⰻ ⱆⱍⰵⱀⰻⰽⱏ ⰱⱏⰹⱅⰻ.
14:27
ⰺ ⰻⰶⰵ ⱀⰵ ⱀⱁⱄⰻⱅⱏ !ⰽⱃⱄⱅⰰ ⱄⰲⱁⰵⰳⱁ ⰻ ⰲⱏ ⱄⰾⱑⰴⱏ ⰿⰵⱀⰵ ⰳⱃⱔⰴⰵⱅⱏ. ⱀⰵ ⰿⱁⰶⰵⱅⱏ ⰱⱏⰹⱅⰻ ⰿⱁⰻ ⱆⱍⰵⱀⰻⰽⱏ. ::
14:28
Ⰽⱏⱅⱁ ⰱⱁ ⱁⱅⱏ ⰲⰰⱄⱏ ⱈⱁⱅⱔⰻ ⱄⱅⰾⱏⱀⱏ ⱄⱁⰸⱏⰴⰰⱅⰻ. ⱀⰵ ⱂⱃⱑⰶⰴⰵ ⰾⰻ ⱄⱑⰴⱏ ⱃⰰⱎⱅⱐⱅⰵⱅⱏ ⰴⱁⰲⱁⰾⱏ. ⰰⱎⱅⰵ ⰻⰿⰰⱅⱏ ⰻⰶⰵ ⰵⱄⱅⱏ ⱀⰰ ⱄⱏⰲⱃⱏⱎⰵⱀⰻⰵ.
14:29
ⰴⰰ ⱀⰵ ⰵⰳⰴⰰ ⱂⱁⰾⱁⰶⰻⱅⱏ ⱁⱄⱀⱁⰲⰰⱀⰻⱑ. ⰻ ⱀⰵ ⰿⱁⰶⰵⱅⱏ ⱄⱏⰲⱃⱏⱎⰻⱅⰻ. ⰲⱐⱄⰻ ⰲⰻⰴⱔⱎⱅⰵⰻ ⱀⰰⱍⱏⱀⱘⱅⱏ ⱃⱘⰳⰰⱅⰻ ⱄⱔ ⰵⰿⱆ
14:30
ⰳⰾ҃ⱙⱎⱅⰵ. ⱑⰽⱁ ⱄⱐ ⱍⰾⰲ҃ⰽⱏ ⱀⰰⱍⱔⱅⱏ ⰸⱏⰴⰰⱅⰻ. ⰻ ⱀⰵ ⰿⱁⰶⰵ ⱄⱏⰲⱃⱏⱎⰻⱅⰻ.
14:31
ⰾⰻ ⰽⱏⰹⰻ ⱌⱄ҃ⱃⱏ ⰻⰴⱏⰹ ⰽⱏ ⰻⱀⱁⰿⱆ ⱌⱄ҃ⱃⱓ. ⱄⱏⱀⰻⱅⰻ ⱄⱔ ⱀⰰ ⰱⱃⰰⱀⱐ. ⱀⰵ ⱄⱑⰴⱏ ⰾⰻ ⱂⱃⱑⰶⰴⰵ. ⱄⱏⰲⱑⱎⱅⰰⰲⰰⰰⱅⱏ ⰰⱎⱅⰵ ⱄⰻⰾⱏⱀⱏ ⰵⱄⱅⱏ. ⱄⱏ ⰴⰵⱄⱔⱅⰻⱙ ⱅⱏⰹⱄⱘⱎⱅⱏ ⱄⱏⱃⱑⱄⱅⰻ ⰳⱃⱔⰴⱘⱎⱅⰰⰰⰳⱁ. ⱄⱏ ⰴⱏⰲⱑⰿⰰ ⰴⰵⱄⱔⱅⱏⰿⰰ {ⱅⱏ}ⱅⱏⰹⱄⱘⱎⱅⰰⰿⰰ ⱀⰰ ⱀⱐ.
14:32
ⰰⱎⱅⰵ ⰾⰻ ⰶⰵ ⱀⰻ. ⰵⱎⱅⰵ ⰴⰰⰾⰵⱍⰵ ⰵⰿⱆ ⱄⱘⱎⱅⱓ. ⰿⱁⰾⰻⱅⰲⱘ ⱂⱁⱄⱏⰾⰰⰲⱏ ⰿⱁⰾⰻⱅⱏ ⱄⱔ ⱁ ⰿⰻⱃⱑ.
14:33
Ⱅⰰⰽⱁ ⱆⰱⱁ ⰲⱐⱄⱑⰽⱏ ⱁⱅⱏ ⰲⰰⱄⱏ. ⰻⰶⰵ ⱀⰵ ⱁⱅⱏⱃⰵⱍⰵⱅⱏ ⱄⱔ ⰲⱐⱄⰵⰳⱁ ⱄⰲⱁⰵⰳⱁ ⰻⰿⱑⱀⰻⱑ. ⱀⰵ ⰿⱁⰶⰵⱅⱏ ⰿⱁⰻ ⰱⱏⰹⱅⰻ ⱆⱍⰵⱀⰻⰽⱏ.
14:34
ⰴⱁⰱⱃⱁ ⰵⱄⱅⱏ ⱄⱁⰾⱏ. ⰰⱎⱅⰵ ⰶⰵ ⱄⱁⰾⱐ ⱁⰱⱆⱑⰰⱅⱏ ⱁ ⱍⰵⰿⱏ ⱁⱄⱁⰾⰻⱅⱏ ⱄⱔ.
14:35
Ⱀⰻ ⰲⱐ ⰸⰵⰿⰻ ⱀⰻ ⰲⱏ ⰳⱀⱁⰻ ⱅⱃⱑⰱⱑ ⰵⱄⱅⱏ. ⰲⱁⱀⱏ ⰻⱄⱏⰹⱂⰾⱙⱅⱏ ⱙ. ⰺⰿⱑⱗⰻ ⱆⱎⰻ ⱄⰾⱏⰹⱎⰰⱅⰻ ⰴⰰ ⱄⰾⱏⰹⱎⰻⱅⱏ. :: ::