И поиде ѿтꙋ́дꙋ а҆враа́мъ на землю полꙋденнꙋю. и҆ всели́сѧ междꙋ̀ кади́сомъ, и҆ междꙋ̀ сѷромъ, и҆ ѻ҆́бита̀ въ гера́рехъ·
Рече же а҆врааⷨ ѻ҆ саррѣ женѣ свое́й, сестра́ ми е҆сть. оу҆боѧ́ бо сѧ рещи жена ми е҆сть, е҆да̀ побию́тъ и҆̀ мꙋжи гра́днїи е҆ѧ̀ ради· посла же а҆вимеле́хъ цр҃ь гера́рьскыи и҆ взѧ̀ са́ррꙋ,
и҆ прїиде б҃ъ къ а҆вимеле́хꙋ нощїю въ снѣ и҆ рече е҆мꙋ. се̑ т҄ы оу҆́мреши жены ради сеѧ̀. ю҆́же поѧ̀, та бо е҆сть жила̀ съ мꙋ́жемъ.
а҆вимелеⷯ же не прикоснꙋ́сѧ е́й, И҆ рече г҃и ꙗ҆́зыⷦ҇ невѣ́дꙋщїи, и҆ пра́веⷣныи погꙋби́ши.
са́мъ ми вѣща̀ сестра ми е҆сть, и҆ сїа ми рече бра́тъ ми е҆сть, чи́стымъ срⷣцемъ и҆ правеⷣною рꙋко́ю сътворⷯи с҄е·
Рече же е҆мꙋ б҃ъ въ снѣ, и҆ а́зъ вѣмъ ꙗ҆ко чи́стымъ срⷣцемъ сътвори с҄е, и҆ пощадⷯѣ тѧ да не съгрѣшѝ къ мнѣ. сего̀ ра́ди не да́хъ ти коснꙋт́исѧ е҆ѧ̀·
Нн҃ѣ же възвратѝ женꙋ̀ мꙋж́ꙋ, ꙗ҆ко пррⷪ҇къ е҆сть, и҆ мо́литъ за тѧ и҆ живе́ши. а҆́ще ли не възврати́ши, вѣжⷣь ꙗ҆́ко оу҆́мреши т҄ы, и вс҄е твоѐ·
Въста же рано а҆вимелеⷯ, призва̀ вс҄ѧ ѻ҆́трокы своѧ̀, и҆ гл҃а и҆мъ словеса̀ си̑ вс҄ѧ въ оу҆́ши иⷯ, оу҆боѧ́ша же сѧ вс҄и чл҃цы ѕѣло·
И҆ възва̀ а҆вимелеⷯ, а҆враа́ма, и҆ рече е҆мꙋ. чт҄о е҆си сътвори́лъ намъ, е҆да̀ чт҄о съгрѣши́хоⷨ тебѣ, да възложи на мѧ и҆ на црⷵтво моѐ грⷯѣ вели́къ ѕѣло· И҆ дѣ́ло е҆гоже никто́же сътворѝ, т҄ы сътвори мнѣ·
И҆ рече а҆вимеле́хъ къ а҆враа́мꙋ, чт҄о оу҆мы́сливъ сътвори с҄е·
Рече же а҆враа́мъ, рекоⷯ е҆да̀ нѣсть боѧ҆́зни бж҃їѧ въ мѣстѣ семъ, да мѧ оу҆бїю́тъ жены̀ ради моеѧ.
Пра́во бо сестра ми е҆сть ѿц҃мъ н҄о не мт҃рїю, и҆ поѧхъ ю҆̀ себѣ въ женꙋ̀·
И҆ бысть е҆гда и҆зведе́ мѧ б҃ъ ѿ до́мꙋ ѿц҃а мое̑го, и҆ рѣⷯ ей пра́вдꙋ сътворѝ съ мно́ю сїю̀, въ всѣхъ мѣ́стехъ в нѧже прїидемъ, тамъ рцы бра́тъ ми е҆сть·
Взѧ же а҆вимелехъ ты́сѧщꙋ дидра́гмъ сребра̀, ѻ҆вца, и҆ волы̀, рабы̀, и҆ рабы́нѧ, и҆ дасть а҆враа́мꙋ, и҆ възвратѝ са́ррꙋ женꙋ е҆го·
И҆ рече а҆вимеле́хъ къ а҆враа́мꙋ с҄е землѧ̀ преⷣ тобо́ю, и҆дѣ́же ти е҆сть годѣ оу҆сели́сѧ·
Са́ррѣ же рече. с҄е дахъ ты́сѧщꙋ дидра́гмъ бра́тꙋ твое̑мꙋ, т҄о да бꙋ́дет̾ по́честь лицꙋ̀ твое̑мꙋ̀, и҆ всѣмъ ꙗ҆́же сꙋть с тобо́ю, и҆ вс҄е правдꙋ́и·
Моли́ же а҆враа́мъ б҃а, і҆ и҆сцѣлѝ б҃ъ а҆вимеле́ха, и женꙋ е҆го, и҆ рабы́нѧ , и҆ начаша раждати,
заключа бо заключилъ г҃ь вн҄ѣѹ҆дꙋ всю рожени́цꙋ. въ домꙋ̀ а҆вимеле́ха, са́рры ради жены̀ а҆враа́млѧ·